2014年10月27日星期一

梁振英話體育界冇經濟貢獻霍震霆：可能仲有前文後理梁振英,

梁振英話體育界冇經濟貢獻霍震霆：可能仲有前文後理

2014-10-26 23:06:00

（攝影：陳順禎）

今晚亞視舉行《2014亞洲小姐大中華總決賽》，即係仲未係真正決賽，除咗選冠亞季軍之外，又會由20位佳麗選出10位進入總決賽。

霍震霆同羅霖任評判，坐上客就有宮雪花，黃夏蕙同一班前亞姐等等。問到之前特首梁振英嘅「體育界同宗教界冇經濟貢獻」，霍震霆被問到呢個問題開頭窒咗一窒，佢話:「可能仲有前文後理，有機會想聽下前文後理，特首應該唔會咁講，喺呢幾個月香港運動員表現都好出色，好似之前特首出席殘奧運動會(編按:梁振英正正就喺呢個活動上面講體育界冇經濟貢獻)，特首帶嚟好好消息，會投放200億起運動場，局長又為運動員做退休保障，其實嚟緊國家會有成萬億嘅投資發展，所以比好多大企業更多元化，特首可能未必係咁講。」問佢會否同梁振英了解下?佢話:「又唔好話了解，會聽返啲訪問。」

而宮雪花到場時就向記者表示有件唔開心事，就係陳勳奇女兒陳杏妍跳樓身亡，佢話佢其一部戲《辣椒教室》佢大仔都有份做，所以同陳勳奇認識，佢話:「估唔到，咁後生好可惜。」問係咁因為陳勳奇冇喺星途上幫佢?宮雪花話陳杏妍好多作品都係佢父親幫手，可能仔女要溝通多啲先知道問題存在。問到佢件事發生之後有冇問候陳勳奇?佢就話之前跌咗電話，就冇咗對方電話。