掃呢頁CODE去手機

2014年10月15日 星期三

[FACE 386] 低調奢華 強國搵錢香港威 佘詩曼豪換百萬 Benz跑 佘詩曼,MF,




佘詩曼駕到,酒店職員即刻貼身服侍,連經理(右)都要目送阿佘上車先肯走。

真面目

低調奢華 強國搵錢香港威 佘詩曼豪換百萬 Benz跑

憑《使徒行者》「釘姐」一角 hit爆的佘詩曼,去年連拍兩套大陸劇,今年又返娘家拍劇再接戲,人仔港紙一齊賺。

搵埋大把, 39歲阿佘梗係要對自己好啲,一向鍾情 Benz的阿佘,早前一擲百萬豪買新 Benz跑,本月 4日,阿佘出動新車到酒店同葉念琛見面,盡顯大台一姐風範。據知兩人係為即將開拍的《十月初五的月光》電影版傾劇本,阿佘相隔 14年再同張智霖合作,仲連續拍《衝上雲霄》同《十》兩套戲,有錢搵又有靚仔睇,難怪阿佘要換車慶祝下!







前週六(4日)下午 3點,佘詩曼單拖現身九龍香格里拉酒店,當日阿佘着住黑色 Benz跑到場,一落車即被酒店工作人員認出,爭住同「釘姐」傾計。據運輸署資料顯示,黑色 Benz跑屬 SL350型號,價值過百萬,剛於今年 7月首次登記,落地僅僅 3個月。

搵埋大把,阿佘俾貼士唔手軟,一行出酒店門口已摷定叠紅衫魚派俾職員。

阿佘喺《使徒行者》入面演技出色話喊就喊,啱啱喺新加坡憑「釘姐」一角贏到「我最喜愛女主角」。電視畫面

大懵漏劇本

阿佘入到餐廳即同葉念琛會合,不過一坐低唔係睇劇本,而係揭 menu揀嘢食。期間阿佘又叫甘筍汁仲叫咗 4件蛋糕,仲有 4小碟冷盤,密食冇停口,反而葉念琛就全程勁講,水都唔多飲啖!傾足兩個鐘,未除過墨鏡嘅阿佘先行離去攞車,但竟然漏低最重要的劇本,要葉導追上大堂遞俾佢,唔通阿佘咁短時間已經背熟劇本?

嗱,唔好以為阿佘咁勤力刨劇本呀,佢手上面咁厚嗰本係餐牌嚟咋!

叫到成枱食物,估計阿佘啱啱起身未食飯,一於填飽肚先講!

𡁻完鬆,阿佘竟然連劇本都冇攞,大懵到呢!

豪派紅衫魚

傾完收工,心情勁靚的阿佘不斷笑笑口,即使等車期間被途人眼望望,阿佘都保持四萬笑容,攞車時仲豪派一百蚊紙俾酒店員工,釘姐果然夠豪!

其實阿佘去年拍了兩套內地劇,雖然唔算爆紅,但總算打開大陸市場。上年 hea住做,今年阿佘忽然發力,先拍了《使徒行者》,再接了《衝上雲霄》電影版,同古天樂、張智霖及 Sammi等合作。下月又開拍由葉念琛執導的《十月初五的月光》電影版,跟手仲有《使徒行者》電影版,完全冇得抖!加上食住「釘姐」個勢接落唔少商演登台,每個收 60萬人仔,做兩場又買到架新車

Chilam同阿佘 14年前拍《十月初五的月光》傳緋聞,事隔多年,兩人再合作拍《衝上雲霄》同《十》電影版,有傳袁詠儀密密監場,誓阻姣佘埋老公身。《蘋果日報》圖片

阿佘上年同胡軍、馬浚偉拍內地劇《忽必烈傳奇》,成功打開人仔市場。

識賺一定賺人仔

港星愛北上搵人仔,搵埋唔少再返香港買車買樓寧捨使得爽手,好似李彩華、馬德鐘同劉愷威,喺內地劇接劇密密執!袋就袋人仔,使就使港紙,變相打個 75折!

圖片

李彩華

酬勞達 30萬人仔一集, Rain 3年內密執 8,000萬人仔,好誇!搵得到, Rain每次返香港即狂掃名牌,早前又以千幾萬買入半山豪宅,仲曾經向記者表示每月俾一百萬媽咪做家用!

馬德鐘

狂接內地劇的馬神,身價達 15萬人仔一集,單計去年已穩袋 4千萬!馬神早前開始養馬做馬主,又買樓送俾父母,更以 1,400萬買入屯門獨立屋,再花 500萬豪裝,另外馬神又同屋企人合股開傢俬店做老闆添!

劉愷威

進身內地劇一哥行列的劉愷威,密密買樓保值。先在北京同老婆楊冪買入別墅譽皇殿, 12年又以 3,000萬買入香港中半山蔚皇居放租,早前再以 6,000萬買入九龍塘喇沙利道一號的 3千呎豪宅自住。



鍾意就快D Share啦!