掃呢頁CODE去手機

2014年10月15日 星期三

[FACE 386] 難為家嫂 姊妹接濟 何嘉莉離婚做 OL 何嘉莉,MF,




週日( 12日),何嘉莉孖住 Yumiko、老公梁學儲、黃伊汶同將於今個月結婚嘅未婚夫陳國坤,去紅館睇黃子華棟篤笑,對住一 pair人,何嘉莉唯有玩電話做低頭族。

真面目

難為家嫂 姊妹接濟 何嘉莉離婚做 OL

今年娛圈特別多人離婚,上月阿 Yu趙頌茹爆出家暴,今次輪到前英皇小花何嘉莉。結婚 8年,何嘉莉突然單方面發聲明同發記甜品老闆丈夫黃逸章離婚,囝囝黃尚恩就由兩人共同撫養。冰封三日非一日之寒,原本係幸福少奶奶嘅何嘉莉,兩年前開始搞時裝生意,身邊一班好姊妹如 Yumiko、黃伊汶做埋軍師獻計,好友 Moiselle太子陳柏熹( Harris)更搵埋何嘉莉入公司擔任創作總監一職,離婚都可以自力更生。

睇完棟篤笑,何嘉莉一行五人去到尖沙咀開餐,好姊妹失婚,新婚嘅 Yumiko同黃伊汶就陪伴左右,面對被本刊追訪時, Yumiko仲即時護駕,認真夠老友!

8年前嫁咗畀甜品大王後,何嘉莉看似幸福少奶奶,可惜有傳入門後一直得唔到奶奶歡心,加上結婚多年,同老公感情轉淡,丈夫生意亦不如前,埋下離婚伏線,何嘉莉亦一早為復出密謀打算。 12年,何嘉莉跟 Moiselle太子爺陳柏熹( Harris)合作開設時裝店 DourStudio,雖然開咗兩年就關門大吉,但就成功埋到 Harris堆。

「做緊設計工作」

週日( 12日),何嘉莉拉埋 Yumiko同黃伊汶兩位好友和她們丈夫,一行 5人去紅館睇男神黃子華棟篤笑,完場後直踩山林道開餐食宵夜,心情靚爆,似乎冇受離婚影響。記者趁機上前傾兩句,何嘉莉話:「𠵱家做緊設計工作,遲啲會有新 brand launch。(贍養費點計?)嗰啲唔答啦。(奶奶仲係好憎你?)咁搞笑?」而 Harris週一( 13日)就大方承認請咗何嘉莉做品牌設計總監,他接受電話訪問說:「我搵佢做呢個品牌嘅原因,係想搵一個唔係專業嘅設計師,配合一班專業團隊起一個化學作用,嗰個人必須有 fashion sense,佢喺我心目中係一個適當人選。」

何嘉莉宣布同黃逸章離婚,而囝囝黃尚恩就由兩人共同撫養。

8年情變

06年,何嘉莉下嫁甜品大王黃逸璋, 12年誕下兒子黃尚恩,點知事隔只係 2年就已經離婚,而容祖兒當年都係糖水鋪常客。

何嘉莉鍾情時裝,淡出後當過形象指導,近兩年頻頻出席各大時裝活動,最近一次就係 8月出席陳柏熹公司的 fashion show。

02年,何嘉莉同陳柏熹開設時裝店 DourStudio,雖然已結業,不過就令陳柏熹對何嘉莉另眼相看,相信其時裝方面的觸覺,將佢羅致其下。

馬年分訊

網上圖片

疑似綠帽

Toby梁靖琪同老公黃敏豪短婚年半時間就離婚,盛傳飛海南島拍《衝上雲霄 II》,同吳卓羲泳池肉搏是離婚的主因。

《蘋果日報》圖片

豪門家變

黎瑞恩同拍拖 6年的金利來太子爺曾智明於 02年結婚,原來嫁入豪門只是表面風光,今年 6月小恩子宣佈離婚。

網上圖片

偷食賤男

曾為娛樂圈模範夫妻典範的趙頌茹同周永恒,上月就爆出周永恒偷食小三 Ruby兼打老婆,最後阿 Yu為咗兩個女而離婚。

死因不明

Amanda S.同老公 Christian Cappelli結婚 3年,今年 7月, Amanda S.突然透過公關向傳媒發表聲明,宣布與老公和平離婚。



鍾意就快D Share啦!