網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年11月21日 星期五

[忽然1周 - 1008] 一億豪宅袋住先  Mandy Lieu再𦧲澳門樓 Mandy,劉碧麗,Mandy Lieu,MW,




近日網上流出一段全長 7秒的短片,估計攝於澳門某賭場。短片中洗米華情緒高漲面紅紅似飲完酒,他坐在穿晚裝露出南半球的 Mandy Lieu身上賭百家樂。記者發現洗米華當日亦戴住婚戒。(紅圈)

打頭陣

一億豪宅袋住先  Mandy Lieu再𦧲澳門樓

粵語殘片年代,大婆惡晒,二奶受罪。不過呢個世代,小三橫行,分分鐘惡過正印。好似模特兒出身的 Mandy Lieu(劉碧麗),今年 8月被爆搭上已婚的澳門賭業猛人、太陽娛樂文化老闆洗米華(原名周焯華)。雖然周太陳慧玲狂 post全家福宣示主權反擊,但 Mandy一樣越級進擊,當人哋老婆冇到。

Mandy Lieu之前高調認與洗米華「發展中」,陪人夫紐約公幹都未夠,最近更有真空「人肉坐墊」陪賭片流出,擺明挑戰周太底線。已收西半山 1億豪宅的 Mandy Lieu,當然未心足,趁得寵時機再下一城。據知她近日有心再在澳門置業,更孖埋洗米華睇新樓盤濠珀,進一步想在澳門插旗。現在跟住洗米華出入賭場的她,當正自己是女主人,正印唔眼寃就奇。











自 Mandy Lieu與洗米華的親密關係曝光後,男方正印妻子陳慧玲一改以往低調作風,突然頻頻網晒幸福家庭照,力證與老公恩愛如昔。其老友李碧君(澳門時尚雜誌《 Soda》創辦人)更在微博代友插爆 Mandy Lieu「不知羞恥」,企圖逼退小三,可惜小三 Mandy Lieu並沒有知難而退,反而步步進迫。

據知洗米華好尊重老婆,為了為正印消消氣, 11月初豪花 5百萬請老婆一班好友豪遊法國,為她慶祝 34歲生辰,更狂送 Hermè s及三千萬鑽飾補鑊。

有指 Mandy Lieu趁洗米華與老婆浪漫慶生期間,向他發「奪命追魂 call」。未幾,冧得掂洗米華的 Mandy Lieu,話咁快就有錢一炮過俾埋西半山層豪宅尾數。根據樓宇按揭紀錄, Mandy Lieu位於西半山的珒然本來只俾了 5%首期,但尾數 8千多萬就在 11月 5日付清。

陪笑任壓

洗米華賭錢時十分緊張,甩牌時不其然壓落 Mandy Lieu身上,不過 Mandy Lieu依然笑口淫淫,十分專業。

洗米華和今年 34歲的老婆陳慧玲關係好好,即使 Mandy Lieu中途介入,但他亦有計𠱁掂老婆。

踩入澳門置業

密謀買新竇

洗米華澳門生意多不勝數,據知 Mandy Lieu為求近水樓台,近日游說對方揼本為她在澳門置業。她睇中的新樓盤「濠珀」位於氹仔金光大道,除坐擁公園靚景外,交通亦十分方便, 6分鐘車程便可到港澳碼頭。而樓盤的複式單位近 4千呎,售價約 3千多萬。

「其實 Mandy好醒,佢睇得出男友好闊綽,加上近三個月嚟陪佢入賭場贏了幾千萬,就乘機𢱑獎勵。而洗米華有感 Mandy腳頭好,出手當然豪爽。近兩個月, Mandy同洗米華呻成日港澳兩邊走好頻撲,落晒嘴頭話想多啲時間陪對方,又話想跟佢去澳門做賭場生意,所以想喺澳門置業咁話,洗米華當然贊成。其實個女嘅明知澳門係正印嘅地頭,但就刻意踩隻腳落去,擺明想入宮。」

其實 Mandy自從與洗米華搭上後,已升呢做老闆娘,除斥資 7位數開「 Quest」模特兒與藝人公司,之前更為太陽娛樂投資的電影《愛•尋•迷》中擔正女主角,更有超性感演出,可惜票房失利。事業停滯唔緊要,皆因 Mandy冧得掂洗米華,有大水喉射住,所以一樣有能力再置業。

「聽講 Mandy之前都睇過路環嘅獨立屋,最近又𥄫中將開售嘅氹仔新樓盤濠珀,貪嗰度鄰近中央公園,兼且有個大型會所。不過因為吓吓都二、三千萬,華哥就叫佢要睇定啲先扑槌。」知情人士說。

放片挑釁正印

據悉陳慧玲亦收到風,得悉小三步步進擊亦嬲爆。但一向在老公面前大方得體的她,現階段惟有以靜制動,因為洗米華出名忌女人囉囌,她不想因此影響夫妻感情,中了小三的陰招。

無獨有偶,當洗米華剛與老婆歐遊慶生完畢,𡃁模間的群組突然流出一條 Mandy在賭場內跟洗米華的陪賭短片。短片中洗米華大讚女方係福將︰「唔驚唔驚唔驚,你買乜嘢,就開乜。」 Mandy則化身人肉坐墊玩「三陪」,她真空露半球任洗米華壓胸兼坐大髀,陪坐陪賭兼陪笑,認真有計。

「班𡃁模收到段片都好震驚,因為賭場咁多閉路電視,擺明係自己人做,加上洗米華咁有勢力,大家都唔敢亂咁影同周圍傳。有𡃁模更爆有人一心爭寵搞出嚟,因為條片一出,一定會激死正印,到時邊個會得到最大利益,唔使講」

不過,其實此片一出,亦隨時有機會引來反效果。因為對於一向尊重老婆的洗米華來說,此舉亦牽動了他的神經,始終有人在自己地頭玩嘢,他亦不會不了了之。

為 Mandy炒員工

近月來陪住洗米華出入賭場的 Mandy,亦儼如半個女主人咁款。據賭場人士透露:

「 Mandy呢排成日過澳門陪華哥賭錢,成個跟得夫人咁款。其實以前華哥賭親錢都有靚女喺身邊,但次次唔同人。周太陳慧玲近年已好少跟華哥落嚟賭錢嘞,所以大家見到 Mandy都當佢係阿嫂,四萬咁口同佢打招呼。有次有個職員唔知碇,冇同 Mandy打招呼兼對佢眼望望,華哥知道後第二日即刻炒咗個員工。至於今次條陪賭片,華哥都吩咐啲𡃁睇番閉路電視,查吓邊個咁大膽搞鬼!」

同場扮唔識

今年 2月, Mandy Lieu獲邀出席洗米華有份投資的澳門珠寶店開幕活動。雖然二人一早認識,但活動上就扮唔熟,全程冇乜交流。

《蘋果日報》圖片

賣肉博上位

近年 Mandy Lieu轉型拍戲,演技普通的她片約不斷,在洗米華有份投資的《愛•尋•迷》中更豁出去賣肉,可惜彈唔起。

擔正做主角

之後 Mandy Lieu更在中台合拍片《痞子英雄:黎明升起》擔正做主角,有個人大頭海報。

正印助打江山

陳慧玲與洗米華的工作伙伴十分熟絡,早前她就跟埋老公、黃柏高(紅圈)等人出埠公幹,正印地位穩固。

坐擁澳門廿個賭廳兼 50億身家的洗米華,有水有樣又有橋,多年來身邊女人不絕。不過,洗米華一向愛錫陳慧玲,雖然陳是他第二任妻子,但由於陳慧玲善解人意,人緣極好,不但與洗米華第一任妻子所生的兒子相處融洽,兩人更育有一名十歲女兒。據知陳慧玲除了在家相夫教子頭頭是道外,十多年前在洗米華未發跡時,陳亦利用她保險經紀的人脈,助夫開拓娛樂事業,令他在短短十多年間,身家暴升幾十倍。

「 29歲的 Mandy細過 Heidi(陳慧玲洋名) 5年,對華哥嚟講係多咗新鮮感,但講到做生意,佢拍馬都追唔上 Heidi。人哋十幾歲已經出嚟社會打滾,之前華哥搞太陽娛樂, Heidi都係執行董事,幫老公打點好多嘢,搞到有聲有色。

「今次條片流出, Heidi睇完真係嬲爆,但佢一向唔過問華哥私生活,惟有暗中喺賭場擺針𥄫實個女人一舉一動,伺機再出招。不過 Heidi同華哥生意上嘅朋友亦甚有交情,呢樣嘢係其他女人唔可以代替。」陳慧玲友人透露。

昔日賭王二太藍瓊纓因為沉唔住氣,最後被四太梁安琪乘機攝位,奪最得寵地位,身家亦暴漲直逼二房。前車可鑑,新晉賭王洗米華的人夫爭奪戰,現在只掀開序幕。 Mandy雖然擺明車馬硬搶,使陰招博入宮,對於忍功一流的周太嚟講,激將法呢招似乎冇咁易成功!

招來招往

洗米華正印陳慧玲( Heidi)雖然是仁愛堂總理之一,但作風低調。即使老公身邊女伴車輪轉, Heidi只採取鴕鳥政策。但隨着老公被爆與 Mandy Lieu撻着後, Mandy愈玩愈大。面對 Mandy強勢挑機, Heidi惟有出招宣示主權,正印和小三隔空大戰。

圖片

Mandy Lieu

夜會斷正

今年 8月,有雜誌拍得洗米華夜會 Mandy,男方除出手從後攬女方腰部外,二人食完飯後更同返男方位於九龍站豪宅。報道又指洗米華打本俾她做模特兒公司老闆。

發聲明認「發展中」

報道出街後,咁啱 Mandy Lieu被爆秘密買入近億的西半山豪宅珒然(僅支付 5%),於是她在微博上發聲明,承認與洗米華正在發展中。但又暗示自己並不知道對方已婚,名副其實又要威又要戴頭盔。

圖片

坐頭等遊紐約

當傳出 Mandy Lieu高調引爆戀情博坐正,惹來洗米華不滿要斬纜同時, Mandy的得寵指數原來不跌反升,有雜誌又拍得她坐頭等機位陪洗米華飛紐約公幹。

正印「華嫂」

晒溫馨合家歡相

「華嫂」 Heidi平日只放自拍相到 facebook,但隨着 Mandy Lieu與洗米華多次密會斷正, Heidi趁洗米華與 Mandy Lieu出發紐約前一天,在 facebook公開一家四口為囡囡慶祝生日的全家福。

圖片

喪禮顯正室地位

今年 9月,洗米華母親唐淑賢病逝,在周母的訃聞中, Heidi依然穩坐正室位置。喪禮當天,洗米華更主動為妻子擋太陽,十分照顧 Heidi。

歐遊豪華生日 P

早前華嫂生日,洗米華為冧老婆,出錢請埋班朋友去歐遊慶祝,更包下餐廳搞 party。 Heidi更與老公齊齊許願切蛋糕,非常風騷。而有澳門 ball后之稱的李碧君,亦校啱時間於微博寫道:「你(指 Mandy Lieu)在他們慶祝她的生日時傳短訊給她丈夫,你不覺得羞恥嗎?」擺明為好友 Heidi抱不平。

小三正印 身家大比拼

Mandy Lieu於短短幾個月便成功上位,成為洗米華新寵外,更袋埋 1億豪宅,認真巴閉。不過正印陳慧玲其實並非省油的燈,她做了洗米華背後女人多年,其間不停買樓買舖,身家已過 3億。

Mandy Lieu

29歲

模特兒兼 model公司老闆

名下物業

西半山珒然高層單位

合共約 1億

Mandy Lieu新竇位於西半山西摩道,一梯一伙,私隱度極高。

珒然高層單位除飽覽維港靚景外,三千呎單位內更有巨廳大房,裝修亦非常豪華。

根據資料顯示, Mandy Lieu 11月 5日一炮過俾 9千萬,成為豪宅女主人。

陳慧玲 Heidi

34歲

仁愛堂總理及

澳門女企業家理事多個職銜

名下物業

壹號湖畔 約 1千萬

凱旋門 約 2千萬

文華薈 約 1千萬

亮點 約 2千萬

金峰南岸 約 1億 5千萬

其他地舖 約 1億

合共約 3億 1千萬

正印小三大鬥法

十個男人九個風流,圈中有唔少已婚男經常偷食,希望可以享齊人之福。不過今時今日的小三愈來愈「光明正大」,手段犀利搶贏人夫的大有人在。

Miki踢走有病正印

07年, Miki(楊愛瑾)跟已婚永安太子爺郭永淳暗交兩年,收入不多的她,當時卻進駐西半山干德道豪宅,最後更成功踢走正印伍智恒( Connie)。身患重病、瘦剩 53磅的 Connie(小圖)最終控訴 Miki係狐狸精,更大爆前夫唔想俾生活費。

四太騎二太上位

澳門賭王何鴻燊生性風流,當時四太梁安琪的出現,令二太藍瓊纓㷫爆,不時隔空與四太展開罵戰。可惜當時二太大勢已去,故她決定長居加拿大,令四太如進入無人之境,極速上位。 09年,賭王入院掀起何家爭產戰,二太立即回朝,並拉攏三房硬撼四太。

女伴車輪轉

人稱「洗米華」的澳門賭業猛人周焯華,於 2011年大舉投資娛樂事業,成立太陽娛樂文化,開設經理人公司及投資電影。財力咁猛,多女埋身絕不出奇,已有家室的他近年不時與𡃁模扯上關係。

水着𡃁模賀壽

洗米華去年在澳門 MGM包場搞三十九歲生日派對,一眾𡃁模着晒比堅尼出席,其中張暖雅、 Lavina(鍾蕙芝)等爆乳𡃁模,更奉命做人肉布景任影任攬。壽星仔洗米華亦愈玩愈投入,在舞池興奮剝衫之餘,更與𡃁模跳熱舞。

圖片

圖片

密會藍莓

去年 5月,洗米華被本刊發現與劉俐(藍莓)於澳門密會,當時洗米華非常有風度,護送女方上落車。事後藍莓堅稱當日只是傾公事而已。



鍾意就快D Share啦!