[忽然1周 - 1008] 《飢餓遊戲》 繼續革命 MW,

歐洋風

《飢餓遊戲》　繼續革命

暫時收起雨傘，並不代表革命完結。

人哋《飢餓遊戲》一書都分上、中、下部啦。嚟緊電影版第三集《自由幻夢》仲一分為二，安排於今年同出年 11月 20日上映。

革命尚未成功，同志梗係繼續收看啦。

其他影片：>>邊咀邊食吞拿魚　《飢餓遊戲》大隻仔彈珍妮花口臭

未正式講今集之前，循例都要回顧吓上集劇情。女主角「凱妮絲」自勝出「第 74屆飢餓遊戲」之後，受到萬民敬仰，認為佢可以推翻暴政，為 12區帶嚟新秩序。但對於霸權政府嚟講，「凱妮絲」難免成為眼中釘，當局仲藉住每 25年舉行嘅「大旬祭」，企圖剷除所有異見分子。

「凱妮絲」不是省油的燈，一箭就打爆「大旬祭」嘅電腦系統，成功逃出魔爪。

被都城捉咗嘅「比德」慘被洗腦，對「凱妮絲」恨之入骨。

今集新加入嘅角色大大話話有 10個咁多，其中呢兩位飾演攝製隊，負責追蹤「凱妮絲」，打造佢成為新一代革命之星。

驚現第 13區

嘩，公然抗命？都城政府梗係震怒回鄉證都費事取消，直頭一個飛彈炸爛「凱妮絲」屋企，等佢連家鄉都冇得返。另一方面，另一支革命軍亦喺 13區集結。

等等先，唔係只得 12區㗎咩？原來多年前， 13區曾出現叛亂，遭到政府報復而全面炸毀。革命軍於是重張旗鼓，靜悄悄喺地底建立基地。

而今集《自由幻夢》將會集中喺「凱妮絲」同革命軍身上。「凱妮絲」答應成為革命軍代言人，利用傳媒打擊政府威信，交換條件就係拯救被囚禁嘅愛郎「比德」。

不過愈合作先發覺革命軍入面，個個都係政棍，最終仲搞到「凱妮絲」雞毛鴨血。放心，我家吓唔會劇透嘅，留待下集上映，先再同大家慢慢講。

「凱妮絲」擅長用弓，有時真係懷疑，喺咁嘅亂世，究竟有冇用？轉用子彈又會唔會有效啲呢？

霸權政府惱羞成怒炸爛「凱妮絲」位於 12區嘅家園，到處頹垣敗瓦。

好在有初戀情人「蓋爾」（左）幫手，「凱妮絲」嘅媽媽同妹妹得以逃出 12區，安然無恙。

13區政府由各區代表組成。值得留意，上集幫都城打工嘅菲臘西摩荷夫曼，原來係革命分子。菲臘今年 2月不幸因濫藥而逝世，《自由幻夢》可以話係佢遺作。

革命軍首領由茱莉安摩亞（右）飾演。佢以推翻都城為目標，但暗地裏做咗好多嗱渣嘢，下一集大家就會知。

「凱妮絲」、初戀情人「蓋爾」（右）同革命軍合作，希望拯救被都城囚禁、曾參加「飢餓遊戲」嘅拍檔「比德」。

電影本安排今個禮拜五（ 21日）於內地上映，但由於題材敏感，被押後至出年先上畫。就連原定嘅亞洲宣傳之旅亦被迫取消，大家無緣一睹珍妮花羅倫絲嘅風采。

鍾意就快D Share啦！

下一篇 》