掃呢頁CODE去手機

2014年11月19日 星期三

[FACE - 391 - 大專校園] UStar完美升格 UStar,MF,




U Star

UStar完美升格

上週二( 11日)第五屆 FACE UStar大專校花校草大選喺九展完美落幕,九位 UStar出盡奇招喺台上施展渾身解數,贏得評判森美同麥玲玲一致好評!

10號港大女高音楊慧敏 Mina憑住性感火辣舞成功突圍跑出,個人橫掃網上人氣 UStar Girl、才藝獎及校花冠軍三個大獎, 17號理大金秀賢吳啟洋 Phoebus就憑靚樣加 beatbox口技險勝勁敵 18號恒管王力宏黃鍵安 Leo贏得校草冠軍,不過 Leo嘅實力各位有目共睹,都贏得網上人氣 UStar Boy同才藝獎,只係輸對方一個馬鼻。

UStar校草理大金秀賢

17號吳啟洋 Phoebus

18/182cm/66.5kg

理工土木工程系 Yr.1

其實我同 UStar呢個比賽好似好有緣, 9月頭我參加理大迎新營,咁啱 Miss Hunny同司徒夾帶入營搵同學參加 UStar,佢一揀就揀中我,叫我參選,加上身邊朋友又推薦我,我就膽粗粗試吓,去到決賽 4強問答環節,咁啱又係佢問返我問題,覺得成件事真係好巧合好有緣!

本來冇打算參加 UStar,因為校草呢個名聽落好似得個殼,無內涵,但當我知道 UStar請星級導師教我哋各種技能之後,我就即刻報名,我𠵱家呢個年紀,求知慾好強,咩都想學。

除咗自己嘅得着,屋企人嘅反應都出乎我意料,我打咗手球 7年,代表過香港出賽,就算贏好多獎,爸爸都冇同我講過一句加油或者鼓勵說話,反而今次 UStar,佢竟然 Whatsapp同我講「細佬,努力!爸爸同媽咪支持您。」睇到嗰刻我真係好感動,原來屋企人喺背後默默支持我!

才藝表演環節, 17號理大吳啟洋 Phoebus(前)孖住 18號恒管黃鍵安 Leo跳舞,兩個靚仔同台演出, chok爆表情加上合拍度十足,成為全晚高潮,贏盡台下粉絲掌聲!

兩父子好多嘢都唔使講出聲,不過 17號 Phoebus爸爸見個囝為 UStar決賽咁落力練習,第一次 send咗個窩心 msg為囝囝打氣,難怪 Phoebus決賽當晚表現如虎添翼

UStar校花 港大女高音

10號楊慧敏 Mina

21/169cm/47.2kg

港大食物及營養學 Yr.3

一開始我都係玩吓嘅心態參選,講靚港大大把人靚過我,喺學校我又唔會化妝,個人又粗魯。你叫我跳舞無問題,但我講嘢真係麻麻,成日食螺絲,所以我想拎啲上台經驗,壯大自己個膽。其實自己入到 10強都好驚訝,我覺得自己唔特別,又冇一技之長,不過好彩參選期間有好多培訓嘅機會,雖然自己有跳舞底子,但唔夠放,又冇咩信心,好彩排舞師 88及工作人員都畀好多信心我,教我好多嘢,我先至可以喺決賽當晚發揮水準,真正跳到 sexy嗰種感覺。

我知道台下嘅媽咪唔鍾意我跳性感舞,佢係個傳統嘅家庭主婦,始終都唔鍾意個囡大庭廣眾跳到咁激,不過當我最後贏埋校花,我喺台上望住佢,我從未見過佢笑得咁開心。

完騷我講笑問媽咪點解冇花送畀我?佢竟然話:「以為你陪跑嘛,點估到你會贏唧!」不過對我嚟講,佢嚟咗支持我已經好足夠!

校花得主 10號 Mina性感舞孃上身,大跳勁舞,令在場氣氛升溫!仲令 Mina成為三料冠軍,認真威水!

除咗媽咪同哥哥到場撐 10號 Mina之外,兩位好友 David同 Pacy都有現身捧場,見證好友成為校花一刻!

動新聞睇 UStar

UStar正片除喺官網同 FACE UStar官方 YouTube Channel任睇,仲登陸埋蘋果動新聞,大家𥄫實

決賽當晚,森美同麥玲玲擔任評判, 10號 Mina同 17號 Phoebus能夠喺口才了得嘅森美同麥玲玲師傅手中得到校花校草冠軍寶座,的確唔簡單!

千辛萬苦終於成為今屆校花校草冠軍,大會當然唔會待薄兩位啦,除咗有一萬蚊現金獎,仲有豐富禮品同華納試音合約,粉絲快啲追佢兩個請食飯

除咗決賽當晚表現出色,至參選以來, 18號 Leo同 10號 Mina經常喺網上投票高踞榜首,網上人氣 UStar Boy同 UStar Girl大獎實至名歸!

做得 UStar當然不只有外表,仲要多才多藝, 18號 Leo琴技高超( 8級), 10號 Mina舞姿撩人,星味十足,齊齊捧走才藝 UStar大獎。



鍾意就快D Share啦!