發哥在佔中時，曾發表「警察做錯了」言論，與王晶持相反意見。估唔到二人相識多年，為此有嫌隙。
娛樂喧
又係黑名單？ 王晶刪戲份保米路 發哥激心拒拍
一場佔中運動，藝人反應兩極化。其中地位崇高的周潤發曾讚佔中學生勇敢，結果有傳遭內地封殺。相反，近年靠搵人仔開飯的王晶，為討好內地，多次表明愛國心跡，早前他自稱搵齊發哥、劉華等 12位巨星，群星拱照他開拍人生第 100部執導電影《十二金剛》。
本來戲中飾演「首領」的發哥已答允演出，但有人為保飯碗，近日靜雞雞將發哥由男一降做客串，發哥不甘淪為大茄，索性辭演。日前發哥向本刊親證：「都冇話拍，噏之嘛！」連向來親民的發哥都發火，棄港投京的王晶，知心友買少見少。
為賺人仔，王晶可以去得好盡。佔中運動初期，識時務的他，已在微博對撐佔中的黄秋生、杜汶澤及何韻詩公開「 unfriend論」。
投資 3億 群星拱照
雖然政府清場，但餘波未了，秋後算帳之事此起彼落。演藝界男神發哥在運動初期，曾讚佔中學生勇敢，結果有傳其言論觸動中央神經。早前網上流傳的封殺名單中，發哥「榜上有名」，但他對此只輕描淡寫說：「咪搵少啲囉！」
發哥淡泊名利，相反與發哥合作超過三十年的王晶，近年積極搵人仔。早前他打算籌備新片《十二金剛》，紀念自己執導第 100部電影。電影預計明年中開拍，戲路依舊貫徹其一向抄橋風格，一班型佬男神在短時間完成多項高難度任務。故事見慣見熟，但卡士方面，王晶自稱已搵到多位一線巨星演出，更講明每位男星片酬有番咁上下，所以預計會投資 3億。月前他接受訪問時曾自爆：「發哥、古仔（古天樂）、張家輝、梁家輝、黄曉明、謝霆鋒都應承咗，劉華就度緊期。」
減價撐老友
據知王晶最初向發哥 sell橋時，講明發哥將會演出片中的「首領」，屬最重要角色。知情人透露：「其實同晶哥合作咗咁多次，即使晶哥俾嘅片酬唔係發哥收開嗰個價，發哥依然拍心口撐老友。」可是，發哥隨後發表的佔中言論，令本來搵他拍戲的王晶陣腳大亂。為防新戲遭內地封殺，王晶曾為發哥講盡好話，淡化事件，「發哥人好，全港皆知。有傳媒硬要拉他同劉德華、梁朝偉下水，暗示他們支持佔中，真是卑鄙之極。其實三人只是認同學生追求理想，珍惜香港未來的接班人，不希望他們受傷，並無政治立場。」奈何最後發哥等人依然在封殺名單內，王晶做盡一切亦徒勞無功。
男一變客串
無計可施的王晶，最後索性大刀闊斧，將發哥戲份大刪特刪，男一淪為客串。知情人透露：「其實晶哥梗係想發哥埋班！話就話大陸封殺，但只要發哥戲份循例減少少，總之唔係佢行頭，就輕易過骨。畢竟發哥叫座力強，香港票房都要靠佢。其實發哥最初都話算數。不過早排有人話俾佢知，原來晶哥連《賭城風雲 2》一段發哥嘅 solo戲都 cut埋，加重咗嘉玲姐同家輝嘅戲。聽到呢度，發哥話不如算啦，唔拍咪當休息下！晶哥收到風，就打算搵成龍頂個角色！」
去年《賭城風雲》在港收 3500萬票房，內地則大收逾 5億人仔。早已放棄香港市場的王晶，就連多年友情亦置之不理。
發哥：冇話拍
日前本刊向放假中的發哥求證，問到他與王晶不和時，他笑笑口否認，但當他聽見晶哥找自己拍《十二金剛》，向來笑面迎人的發哥，即嚴肅地斬釘截鐵說：「我都冇話拍，噏之嘛，冇呢件事。」
激爆言論保飯碗
為了保障內地市場，王晶先後在微博發表挑釁言論，更宣布要與「佔中三寶」黃秋生、杜汶澤和何韻詩絕交。
|
鍾意就快D Share啦！
|
|
|
