掃呢頁CODE去手機

2014年12月26日 星期五

[壹週刊 - 1294] 信錯人 莊思敏執笠蝕 200萬 莊思敏,M1,




探熱針

信錯人 莊思敏執笠蝕 200萬

拿督女莊思敏,去年一鼓作氣,連環投資搞模特兒及經理人公司,頭尾冇兩年,已經蝕近二百萬,最終要宣布執笠唔玩!

莊思敏因為瓣數多分身不暇,一度將模特兒公司導師重責交好姊妹 Ann Ho(何紫綸),可惜對方得一想二,部署插手經理人公司,獨攬大權,可惜薪酬高能力低,公司蝕錢愈陷愈深,結業前三個月零收入,莊思敏唯有壯士斷臂,摺埋止血。

莊思敏將紙皮箱及手提喼放入車。

寫字樓月租十萬,十二月尾正式交吉,莊思敏連日返公司執手尾。

打擊大

公告大股東決定將兩間公司結束後,上週三(十二月十七日)下午五點,老闆之一的莊思敏,素顏黑超拉住空喼返回位於中環蘭桂坊的寫字樓收拾私人物品,逗留約半個鐘,便左手紙箱右手拖喼離開。

將物件搬上停在隔籬的紅色 Benz,開車離開前,莊思敏在車廂接受訪問,承認今次是忍痛結業,單是個人計,已蝕近二百萬。

「我冇諗過咁 worse,都幾大打擊,經過今次,我覺得最緊要係識得揀 partner,有啲嘢唔係自己控制範圍做到,所以冇辦法。(是否信錯人?)之前同人搞嗰間 Beauty Kingdom化妝學校就一定係,有人穿櫃桶底(今年三月已報警處理);至於今次搞 management公司,最緊要有個好嘅經理人坐鎮,其實原本嗰個幾好,同事都覺得佢幫到手,只係後來阿 Ann好想試做經理人,公司其他 partner又太心軟;後尾先發現呢個模式唔 work,搞到間公司運作唔到,轉咗人之後所有嘢都停晒,好難再 build up番。」莊思敏說。

三個月前, Ann Ho仍有放跟莊思敏合照在微博,自此以後未有合照出現過。

17歲入行的 Ann Ho, 2000年跟張栢芝細佬張豪龍拍拖, 09年分開,現年 33歲的她,已升呢做導師訓練準備入行的模特兒。

經理人公司簽了王晶女王子涵,因無 job結業,她亦解約返內地發展。

冇聯絡

據了解,四個月前, Ann Ho瞞住莊思敏氹掂公司大股東,將有經驗的經理人解僱,為了擴張勢力, Ann Ho安插自己友入職,可惜全是無經驗又唔願返工,令經理人部門於過去三個月錄得零收入記錄。加上公司長期投資失利,已蝕了二千萬,大股東遂決定關門大吉。

因為 Ann Ho要獨攬大權,令經理人部門雪上加霜,對此,莊思敏在電話作出回應。

「都係(你哋仲有冇聯絡?)冇。(反咗面?)只係唔聯絡,又冇嗌交嘅。」莊思敏說。

做老闆外,莊思敏又頻頻接 show出活動搵銀,八足咁多爪。

《十月初五》電影版開拍,莊思敏亦有份演出,上週便到澳門出席開鏡儀式。

化友為敵

朋友合作,好易因為意見不同,或者利益關係而發生衝突,圈中實例,更加舉目皆是。

余文樂 周柏豪

去年因為速食快撇籃球隊「橫洲工業」隊友細妹,辣㷫隊長余文樂,兩兄弟自此決裂,余文樂更號召其他隊友同對方割席;今年余文樂帶隊為飲品拍新一輯廣告,全組上陣,獨欠周柏豪。

曾志偉 余詠珊

余詠珊投無綫,全仗恩師曾志偉從中協助,不過自獲老闆陳國強信任後,便恃勢鬆毛鬆翼,忘恩負義到連恩人都冇面俾,甚至趕絕志偉嫡系人馬,二人徹底反面。



鍾意就快D Share啦!