2014年12月22日星期一

企亞視門口抗議嘲亞視冇糧出似風濕：不時會發作亞視,

【光仔仔又嚟】企亞視門口抗議嘲亞視冇糧出似風濕：不時會發作

2014-12-22 12:41:00

(攝影:陳慧安)

成日去電視台抗議嘅「光仔仔」，呢期亞視又拖糧，佢今日都有去到亞視大埔總台抗議，未夠9點，「港九工團聯合總會」主席李國強去到亞視門口拉橫額，上面寫住標語「亞視蔡洐明股東，請代支職員人工。」李國強表示之前亞視有10幾個員工聯絡工會，希望得到幫助，佢就亞視拖糧7日已經違反僱員條例。

問到佢會有咩行動?李國強表示:「法庭18號已經委任德勤做監管人，呢間公司可以聯絡到亞視所有股東，睇下邊個願意出糧，第一，發信俾股東，第二，召開臨時股東大會。」問佢個股東大會幾時開，佢話:「唔清楚佢哋幾時開，但一定要24號之前開呢個大會，到時會有初步結果，但幾時開就唔知。」佢亦喺門口向員工派單張。

光仔仔自己就拎住2張A4紙，一張寫住《光影我城》，另外一張就寫住「打工出糧天經地義」，又喺現場高呼「我要有糧出」，佢受訪話:「其實我想呼籲，馬會話有後備方案，我覺得應該要提供網上直播囉，令到馬迷同六合彩有更多選擇，因為如果亞視執咗之後，o依家係得一個機構去播，其他要比錢。」講到咁佢應該去馬會抗議，佢就話「冇辦法」。

問光仔仔淨係喜歡睇馬?佢話:「馬都要睇，相信大家唔知道《光影我城》咩意思o架啦，光影我城其實就係下星期港台重播《屋簷下》，情況就好似亞視咁，個名係好聽，但都係以前啲嘢，我希望亞視一係拎返個牌出嚟，一係就出糧。」然後光仔仔突然拎支七喜出嚟飲，問佢呢個行為有咩寓意，佢就話:「我睇動新聞，飲百事就係飲得杯落，咁七喜意思係『執起』咁解，執咗佢嘅意思，長痛不如短痛啦，o依家正如好似風濕咁，不時會發作。」佢又無端跪地話:「我希望啲有錢人呀，股東呀救下亞視啦，希望亞視唔好競投賽馬同六合彩播映權。」

而亞視公關今朝亦有拎啲熱飲出嚟比傳媒，10點鐘左右勞工處員工就搭的士到場入去亞視，佢哋係應新聞部要求同亞視員工講解情況同做登記，而除新聞部同事之外，部份員工同藝員都有返去亞視聽講解。