2014年12月22日星期一

潔儀姐姐打的拖喼返工蔡國威望今日內解決潔儀,

【亞視冇糧出】潔儀姐姐打的拖喼返工蔡國威望今日內解決

2014-12-22 13:22:00

(攝影:陳慧安)

亞視冇糧出第22日，勞工處今日派員去到亞視了解，亞視藝員楊正軍上午9點半返到亞視，佢話:「我今日返嚟開廠做《星動亞洲》，知道10點勞工處嚟，有時間都會去聽，有興趣會登記。」問到經濟情況?佢話自己有向媽媽借錢，咁媽咪好擔心?佢話:「OK啦，今日做冬唔多唔少都會影響到，阿嫲又出院。」問佢份合約去到幾時?佢話到明年，咁會唔會主動解約?佢就回應:「暫時冇咁諗，對公司有信心，做咗58年實捱到嘅。」問佢有冇聽過幕後有罷工? 佢話有聽過31號都冇糧出的話，有啲Crew同新聞部一樣會罷工，咁擔唔擔心唔續牌?佢話依然樂觀，仲透露亞視籌備緊2015年春晚。

袁潔儀就拖住個喼坐的士返亞視，佢幾年前嫁咗去廣州，又堅持要喺廣州瞓，所以落香港返工要拖住個喼，佢話自己都會登記:「跟大圍啦，就算陣間聽唔到勞工處講解，同事應該都會講返。」擔唔擔心冇糧出?佢話唔擔心，問係咪因為有老公養?佢話:「其實大家都努力，以前曾經試過做生意蝕錢，受過呢個教訓，o依家各有各做。」咁知唔知可能有罷工?佢話唔知，又透露合約到明年9月14號。

問潔儀姐姐會唔會主動解約?佢就話:「各有所取，順其自然，我未有呢個諗法，呢個情況睇下點啦，其實個個禮拜亞視都有活動，我主持《我愛下午茶》，聽日都仲有通告囉，聽日都照返工。」咁續牌方面有冇信心?佢話:「都有信心嘅，o依家只係上層方面嘅事，傾唔掂啫，中間呢個階段我呢班中間人無所適從。」

「合六彩之子」蔡國威就今朝喺廣州趕返嚟開廠，佢話會向勞工處先了解，佢同楊正軍一樣開《星動亞洲》，因為想聽勞工處講解，要求導演遲半個鐘先開廠，想知個程序係點。問佢公司內部有冇指示，佢話:「今日係冬至，冬大過年，希望公司今日之內解決到問題，令到大家食返餐好飯。」講到有可能啲Crew同新聞部一樣罷工，佢話:「要睇下勞工處有咩意見囉，做藝人好難嘅，因為我主持嘅六合彩，冇可能因為咁樣而停，所以做藝人會跟返公司安排，返工嘅就要返工。」咁咪即係貼錢返工?佢話:「都22日啦，全公司都係要貼錢返工，擔心實有，希望呢9日內盡快解決，葉家寶o依家都好努力游說啲股東，呼籲各位股東快啲解決。」

蔡梓銘今日又係搭的士返亞視，佢話:「其實有聽聞平安夜嗰日會出糧，自己好期待，唔太擔心，出面有啲電台工作，勞工處方面會聽下，合約去到明年8月。」佢又苦笑剛續約就發生咁多事，又相信2015年會更好，透露管理層有道歉，不過都係覺得出糧最實際。