掃呢頁CODE去手機

2014年12月2日 星期二

陳琪小產險切子宮 胡諾言生仔夢碎 陳琪,胡諾言,

經歷流產後,胡諾言夫婦會更加珍惜愛錫兩位女兒。


陳琪小產險切子宮 胡諾言生仔夢碎

無綫女藝人陳琪早前為老公胡諾言再度懷孕,已育有兩女的她滿心歡喜為恨仔的胡仔圓夢,卻不幸發現小生命已無心跳,故應醫生建議進行人工流產,但出現突發事故,流血不止的陳琪被告知若三小時內情況持續,將要切除子宮!雖然陳琪在最後關頭保住子宮,卻已再難為胡仔再添小生命。

現年40歲的無綫藝員陳琪,與37歲老公胡諾言結婚5年,育有兩名分別為5歲及2歲的女兒。早前她再度懷孕,一心欲圓老公生仔夢之際卻發生意外。她說:「舊年11月我意外咁有咗,我哋唔容易有BB,試咗好耐,雖然冇特別去造人,但22個月以嚟一直都係白果,嗰輪拍《點金勝手》有日覺得身體唔妥,睇醫生話我有咗5個星期,既然有咗就好想有。但可能冇準備好,最終都佗唔穩。」

心情極驚恐

陳琪憶述意外小產經過:「有日開廠,喺化妝間覺得唔舒服,通知拍緊外景嘅老公,佢即刻送我去醫院,老公返去繼續開工,因為見紅(流血),醫生建議我留院,後尾一照,發現BB已冇心跳,醫生仲安慰我:『可能BB仲未ready嚟呢個世界,唔好睇得咁嚴重。』我都接受到嘅,情緒冇好大變化,仲問點樣攞番BB出嚟,醫生建議自然排出,但等咗兩星期都冇動靜,好唔正常!」

候診期間,胡諾言爭取時間到街市買餸,盡量避免太太操勞。
  • 候診期間,胡諾言爭取時間到街市買餸,盡量避免太太操勞。
陳琪(右)睇中醫時沒甚心情,似仍未走出流產陰霾。
  • 陳琪(右)睇中醫時沒甚心情,似仍未走出流產陰霾。

不能將小生命帶來世界,更險令陳琪有生命危險。她說:「醫生建議我接受人工流產,手術簡單約15分鐘,我仲plan咗一點鐘做,做完約人食飯,但到我醒番,已經三點,屋企人喺晒度,護士同我講:『你同屋企人揮吓手。』咁怪嘅?仲成床血,我感覺到張床單被血染濕晒,血壓跌得好緊要,食凝血藥後又嘔又暈,醫生話要輸血,仲話需要搵個高級外科醫生幫手,如果六點前搞唔掂要切除子宮,當時兩個醫生八個護士圍住自己,我感到前所未有咁驚。」

胡諾言與陳琪細心聆聽醫師吩咐。
  • 胡諾言與陳琪細心聆聽醫師吩咐。
陳琪坦言女兒似知道流產一事,會待她們年紀較大時才詳細告知。
  • 陳琪坦言女兒似知道流產一事,會待她們年紀較大時才詳細告知。

不追究醫院

雖然最後保住子宮,但陳琪說:「醫生喺六點鐘將氣球放入我子宮,嘗試幫我止血,結果真係唔再流血不止,算係保住子宮。」但醫生不建議她再懷孕,她謂:「唔係個媽媽有危險,就係個BB保唔住,所以我決定唔再生,但老公一直想有仔,佢失望話:『雖然個子宮係冇切到,但醫生咁講已經同切咗冇分別。』我本來想追究醫院,但睇咗幾個唔同醫學權威,都話現時醫學上有好多流血不止嘅個案都係解釋唔到,最終都無奈接受。」而一直恨有兒子的胡仔直言十分失望:「醫生話冇切子宮,但都等於切咗。」

睇中醫調理

雖然胡仔不能圓生仔夢,但依然愛錫太太!日前早上胡仔便陪太太到牛頭角睇中醫,為免太太辛勞,他自己去排隊,讓老婆舒適地坐在私家車上等候。候診期間,他又去買餸,更買了太太最愛的缽仔糕,然後返中醫館繼續等。約半小時後,終於輪到陳琪,胡仔即扶實老婆睇中醫,然後一齊去接囡囡放學。

文:影視組



鍾意就快D Share啦!