【高危行動】40歲陳山聰玩命 力追24歲港姐陳凱琳 行外母政策
2015-01-18 17:32:00
陳凱琳係大台嘅受保護人物，「四失聰」咁都夠膽出手。(instagram圖片)
40歲陳山聰自從同何超雲分咗手之後，就做咗「四失聰」，有段時間冇工開，就努力練跑，但就被爆佢為咗搲贊助，就想埋長跑常客徐濠縈堆，但就畀阿徐班跑友背後唱佢係「TBB小強」，跑步條財路又冇埋，人生真係迷失。而喺今日就有雜誌報道，話「四失聰」又有新目標，力追出身富貴嘅港姐冠軍陳凱琳(Grace)。
報道指「四失聰」因為追女仔嘅手法過份低裝，所以電視城有唔少人都知佢力追陳凱琳，知情人話，兩人喺新劇中係飾演爺孫，本身唔多對手戲，但陳山聰成日拍完都唔走，等之後嗰場Grace入廠，主動教Grace走位做戲。
呢位知情人士仲話，之前劇組去咗橫店成個月拍外景，Grace媽跟埋去照顧囡囡，陳山聰索性行埋外母政策，成日借意獻殷勤，又主動話帶Grace呢度去嗰度去，飲飲食食兼遊覽車，班幕後都睇得出陳山聰對Grace「寧舍唔同」，就連男方個ig都係咁擺佢同Grace嘅合照；不過Grace就好少擺陳山聰嘅相。
其實依家Grace俾大台力谷，又受到國寶級嘅保護，拍劇又有免咀金牌，陳山聰想高攀，真係好危險，不過佢今日接受本報電話訪問時就否認謂：「笑話，冇回應。」咁係咪好熟落？陳山聰話：「咁我哋一齊拍劇，佢做我曾孫女，大家有太多聯想，都係嗰句啦，新聞係咁。」有否不開心？「冇冇冇。」至於現在感情生活，佢就話：「講咗啦，空白，好忙好忙呀！」
睇嚟真係好危險。(instagram圖片)
(instagram圖片)
(instagram圖片)
|
鍾意就快D Share啦！
|
|
|
