一家三口享天倫 張家輝陪囡暗角打韆鞦
【中環】
有人鍾意暗角打鑊，但影帝張家輝就鍾意帶囡囡到暗角打韆鞦，皆因暗角位置唔容易俾人發現，等佢可以靜靜地陪愛女玩，享受天倫之樂。上周日（4日）家輝同老婆關詠荷以及8歲囡囡Brittany去中環大班樓食晚飯，一家三口擦到夜晚7點離開，之後齊齊沿住中環街頭漫步。Brittany着住白衫白裙仔，邊行邊跳，跳跳紮相當活潑，其間有途人認出家輝，上前要求合照，家輝都表現友善一一答應要求。企喺旁邊嘅Brittany見到爹哋咁受歡迎，亦望住媽咪笑咪咪好開心。
【溫馨夜遊】
■張家輝拖住囡囡Brittany跟老婆關詠荷街頭漫步，場面夠晒溫馨。
【公園耍樂】
■家輝帶囡囡到暗角小公園打韆鞦，帶住牛角頭飾嘅Brittany仲越盪越高，關詠荷要全程𥄫實。
【粉絲自拍】
■粉絲捉住家輝玩自拍，囡囡見爹哋咁受歡迎都好開心。
越玩越興奮
之後家輝一家三口去到元創坊行街街，但年紀細細嘅Brittany對各式各樣設計品完全提唔起興趣，一度向爹哋同媽咪撒嬌話：「都冇嘢睇嘅！」見個女興趣唔大，家輝同關詠荷於是逗留20分鐘左右就匆匆離開，準備返去大班樓附近攞車。佢哋途經一個暗角小公園，家輝就帶囡囡入去打韆鞦解悶。由於嗰度屬暗角位置，兩夫婦可以安安靜靜坐低陪囡囡玩個夠本。見Brittany越盪越高十分興奮，關詠荷好緊張咁全程企喺側邊，𥄫實囡囡安全，而家輝就不停講電話，前後逗留咗15分鐘就同老婆及囡囡離開。
採訪、攝影：陳辰、吳耀輝
【玩夠返歸】
■食飽行完街兼玩完一輪後，家輝攞車載老婆同囡囡返歸。
|
鍾意就快D Share啦！
|
|
|
