陳奐仁欠債成謎 ：冇可能被追債
2015-01-25 15:04:00
Stephy後悔膚色曬黑咗。
鄧麗欣（Stephy）、陳奐仁、文恩澄今日下晝去到鑽石山荷里活廣場出席《同舟共勉 •愛家愛港活動》。
陳奐仁近日被人掛起追債banner喺電視台門，欠債成謎，今日當事人親身否認事件，陳奐仁話:「係惡作劇，我冇爭人錢，冇可能被追債，如果有人覺得我欠佢錢歡迎出嚟見證。」咁係咪得罪人呢？陳奐仁冇頭緒話:「我待人一向有禮，唔知係咪有咩誤會，如果係可以出嚟，唔好屈住，希望我都幫到對方解決心結。」
陳奐仁講到一臉無奈，最傷心係憶起高中時曾患抑鬱症時被人冤枉嘅時候，幸好身在星加坡父母對佢信任，不過就不斷接電話向唔同親友解釋。banner就掛喺無綫門外，無綫咁緊張聲譽，當然從速搵陳奐仁了解啦，後來就幫陳奐仁出聲明話欠債係失實事情。不過陳奐仁話:「希望有人見到邊個掛banner，幫我問下佢點解咁做。」
Stephy透露啱啱同方力申去完馬爾代夫享受陽光海灘,後悔膚色曬黑咗，覺得唔襯自己，笑言:「依家有啲似菲籍，要極力美白。」去到世外桃源旅遊勝地，大解放是正常吧，Stephy就冇呢個膽量，話驚畀人影到相，不過都帶咗好多套泳衣去留影。至於小方有冇效法許志安當年沙灘曬巨鵰?Stephy就話小方好緊慎嘅。今次享受浪漫二人世界係佢地順道預祝情人節同小方生日，咁浪漫好易搞出事喎?Stephy即笑笑口話:「冇事冇事。」
陳奐仁:「係惡作劇，我冇爭人錢。」
(攝影：沈建程)
|
鍾意就快D Share啦！
|
|
|
