梁桂儀 Abbie Rain 22歲 時裝及紡織系 Yr.3
U花 U草
理大辯論女王 堅愛杜如風
原來 Abbie之前叫 Rain，但因為去外國時俾啲外國人話 Rain根本唔可以拎嚟當名用，不過佢又好鍾意 Rain呢個字，而佢乳名叫做阿 B，所以索性兩者二合為一，變成𠵱家 Abbie Rain呢個名。
世界級港女杜如風主持大台旅遊節目，《流行首爾》俾人插到飛天，除咗因為佢大癲大肺嘅主持手法，仲有杜如風鐘意「買咩就買咩，講咩就講咩」的真性情，被觀眾、網民喪鬧是常識吧！
咪以為杜如風係「全民公敵」，其實都有唔少人撐。好似讀香港理工大學時裝及紡織系 Yr.3嘅梁桂儀（ Abbie），佢就好欣賞杜如風 style嘅主持風格，「係講嘢慢咗少少啫，但起碼有人會記得佢，同埋睇得出佢每樣嘢都係真心推介俾觀眾，唔係照稿讀、交行貨！」大台啲觀眾口味，我識條鐵咩！
雖然 Abbie𠵱家讀時裝及紡織系，但其實佢話最想係做旅遊飲食節目嘅主持：「一嚟自己強項係講嘢，二嚟自己好鍾意去旅行，試新嘢，所以希望可以將興趣變成職業。」問佢會唔會擔心對住鏡頭口窒窒，又或者好似杜如風講嘢咁慢，佢充滿自信話：「你放心，我係理大辯論隊嘅主力嚟㗎，平時對住百幾二百人講嘢滔滔不絕都係咁，冇問題！」
一般學生妹閒時都係鐘意買衫食甜品、睇戲唱 K，但 Abbie就好鐘意試新嘢，細細個已經跟哥哥去學潛水，仲考埋國際認可 PADI的進階開放水域潛水員資格（可潛 40米），又鐘意一個人去背包旅行，有次去印度旅行，見到有馬術學，仲特登留在當地學咗一個月：「我學騎馬唔係諗住俾訓練員拖住就算，我想人馬合一，喺草原策馬奔馳嗰隻，我𠵱家都可以一個女仔騎住隻馬四圍跑！」有樣有身材，講嘢又叻，仲識埋潛水騎馬，未來旅遊節目主持 icon仲唔係你？
Abbie話愛上潛水，全因細個受猛料哥哥（持有可潛 80米的教練牌）薰陶，仲話第時要同哥哥一齊深潛沉船探險。
|
鍾意就快D Share啦！
|
|
|
