[忽然1周 - 1022] 《衝上》愈鬧愈收得 Cool魔阿佘狂派錢 Cool魔,佘詩曼,阿佘,MW,

電影公司特別準備咗個「衝出地球」蛋糕賀票房大收，不過 Cool魔只係掛住同阿佘傾偈，仲傾到鬼咁興奮。唔通派 1百蚊封利是嘅佢，問阿佘點解派 2百蚊利是咁鬼豪？

媽咪姐

《衝上》愈鬧愈收得　 Cool魔阿佘狂派錢

新年新希望！媽咪姐喺度先要同大家拜年，祝各位 day day都靚靚，甜蜜又富足，健康有食神呀！

其他影片：>>瓊姐愈插愈強　《衝上雲霄》票房贏發哥　 Chilam搞慶功

Sammi發功

主角之一嘅 Sammi，冇去周三（ 25日）晚嘅慶功宴，不過佢好勤力喺網上宣傳《衝》片。 Sammi同 Sam哥呢幕「抹窗舞」，媽咪姐有唔少靚太 friend睇過都話搞笑得嚟又浪漫㗎。

我大把喎，做咩唔等我一齊派！（設計對白）

嘻嘻，好似有啲貪心，但做人梗係要積極向上，時刻 keep住正能量嘛！好似賀歲片《衝上雲霄》咁，上咗冇耐就俾網民插佢劇情鬆散，似睇咗 3個 MV（想知多啲，等陣揭去 P.55，有娛文樂同大家分析）。不過你咪理，短短幾日票房已經衝破 2千萬，連香港精神領袖發哥嘅《賭城風雲 2》都唔夠佢鍊呀！你問點解咁多人鬧都咁收得？

媽咪姐覺得呢個結果係完全正常喎！首先，新年流流一家大細入戲院，無理由睇《 12金鴨》啫，唔通同囡囡討論師兄個 body好啲定古仔正啲咩？跟住賭神發哥梗係正！但導演係晶哥喎，近年背靠強國嘅晶哥喎！真係有啲驚跟唔上「國情」囉。嗱，咁黃百鳴嘅《浮華宴》係夠老少咸宜嘅，但真係好金碧輝煌，土豪啲囉！

大台食住個勢，喺周一（ 23日）深夜忽然重播 2002年版《衝上雲霄》，好多人都話勁懷念，有排唔使瞓呀。

睇嚟睇去，靚人靚景靚歌嘅《衝上雲霄》真係最穩陣，最啱我哋香港人睇！話晒 13年前就睇住 Sam哥喇，嗰時仲未成街自由行，「那些年」係幾咁寧靜又美好。再睇番財爺啱啱嗰份悶到暈、幫唔到咩手嘅財政預算案，各位姊妹點會唔想衝上雲霄……一陣，幻想下自己同古仔談情都好吖！

咁開心一定要 share， Cool魔張智霖同佘詩曼啱啱去咗《衝上》慶功就大派利是，人人有份，而且非常重手㖭！ Cool魔仲好謙咁話：「今次成績咁好，我都係掹車邊，靠鎮宇同古仔，希望以後再有機會合作！」開晒口想拍續集喎，有錢齊齊搵，呢啲咪香港精神囉！

Sam哥輸晒

相比 Chilam同阿佘， Sam哥就無豪派利是。佢話：「尋日幫人發咗新年財，玩啤牌『贊助』咗千幾蚊。」哎吔，輸咗錢，難怪㩒住荷包

之前導演鄒凱光（右）反擊網民，話真係唔覺得《衝上》係爛片，但呢晚慶功宴佢就唔再回應，仲笑晒口。又係嘅，套戲收得嘛，而一齊執導嘅葉偉信都話好鼓舞呀！

新年衝去邊？

查實呢，拍《衝上》拍到幾型幾 chok都好，人都係會攰嘅！趁住新年，梗要唞吓啦，個個都節目豐富，好繽紛呀。

Sam哥忙湊仔

近年成日返大陸做嘢嘅 Sam哥，着到成身紅色賀吓年，賭吓錢之餘，又不忘整蠱囝囝 Feyman。呢個阿爸好百厭呀！

Sammi洗碗樂

做咗「十嫂」嘅 Sammi，新年梗要留喺屋企招呼吓親朋，佢仲話好 enjoy洗大量碗碟㖭！安仔得此賢妻，真係夫復何求呢。

Cool魔撐上癮

Cool魔為咗撐自己孭飛嘅《衝上雲霄》可以去到幾盡？佢除咗試過 post上映戲院名單上網，仲公告天下，話自己睇咗兩次咁多！出盡力啦。

鍾意就快D Share啦！

下一篇 》