[忽然1周 - 1022] 自抬身價嗌高四倍人工 許亦妮扮大牌遭雪藏 許亦妮,MW,

是非精港姐

由參選港姐至今，出名多是非的許亦妮，被指經常擺阿姐款，得罪人多稱呼人少，加上今次得罪高層余詠珊，注定冇運行。

娛樂喧

自抬身價嗌高四倍人工　許亦妮扮大牌遭雪藏

出名是非多的許亦妮，當選港姐後工作寥寥可數，局住硬掘萬二底薪。不過她勝在識睇時勢，前年她成功埋綜藝科揸 fit人余詠珊堆，不但有劇拍，亦有得上綜藝節目賺騷錢，可是，因其工作態度差經常遭投訴。

本刊收到消息，上月初有人目睹許亦妮與余詠珊在綜藝科樓層講數，其間許提出希望加薪 4倍，否則不會續約。有人覺得她獅子開大口，遂勒令雪藏她，要她諗清楚。事後許亦妮知道玩大咗，帶埋媽咪返藝員部搵樂易玲，希望她出面代求情，望珊姐收回成命。

據知余詠珊一度睇好許亦妮，可惜有人恃寵生驕，結果許遭大台雪藏。就此記者聯絡過余，但她表示不會回應任何提問。

近年港姐人工縮皮，有傳「最靚港姐冠軍」的陳凱琳亦只得八千蚊人工，還要局簽長約。至於 11年當選季軍及最上鏡小姐的許亦妮，由於被大台睇中打算力捧，早已簽為經理人合約，底薪萬二簽 4年，總算前途光明。

微博呻爆

由去年聖誕開始，許亦妮開始遭大台擲入雪櫃，冇工開的她，日日上微博，更呻自己唔開心。

《喜愛 3》後態度變

不過入行後許亦妮負面新聞不絕，經常藐嘴藐舌嚇怕一班廣告客戶，因而接唔到商演騷，頭一年幾乎硬𢭃底薪。但她勝在夠主動，眼見余詠珊上位，即主動「上門」向余自薦做綜藝節目。一知情人透露：「 Whitney（許亦妮）做嘢好進取，佢見 Sandy（余詠珊）堆嘅人唔多，所以嗰排成日上 Sandy房傾偈。 Sandy開頭都安排 Whitney上綜藝節目，見佢幾玩得又唔介意性感，咪安排佢拍祖藍套《老表，你好嘢！》同王菀之爭張繼聰。不過 Whitney前年拍完《喜愛夜蒲 3》做咗女一之後就自以為巴閉咗，態度轉晒，舊年拍《街頭魔法王 2》已經俾工作人員投訴佢唔跟稿又遲到，仲同有份拍嘅 Anjay（陳嘉寶）針鋒相對。」

執二攤做女一

由於陳靜（ DaDa）罷拍《喜愛夜蒲 3》，許亦妮攝上位擔正做女一，水鬼升城隍的她，自以為身價今非昔比。

最後亮相

許亦妮最初碼掂余詠珊，有份拍攝《街頭魔法王 2》，但其間屢傳她與劇組人員和拍檔不咬弦，加上今次扭計要加人工，因此《魔 2》隨時成為她最後「遺作」。

珊姐發火

許亦妮由於最初埋珊姐堆，如今又要樂易玲出手求情，樂小姐放軟手腳是常識吧！

據知《街頭魔法王 2》上輯收視平均 20點，在周六時段算不俗，故一直有意原班人馬開第三輯。本刊收到消息，個多月前許亦妮與余詠珊在公司傾拍《街頭魔法王 3》一事，其間許亦妮表示要「加人工」先講，因此觸怒余詠珊。知情人續說：「因為 Whitney依家份約係$12,000底薪，另再計$500一騷。佢一直覺得自己係雙料港姐季軍，條件好，又拍過電影，唔應該只得呢個待遇。所以佢嗰次膽粗粗向 Sandy提出話喺今年 8月約滿後要加人工，底薪加到 4萬 8，騷價亦要加到 1千，如果公司肯加人工先肯拍，唔係就考慮唔續約。 Sandy即刻着火拍枱鬧爆，話 Whitney未顧掂自己仲要講人工， Sandy嬲嬲哋就話叫佢停薪留職先，返屋企諗清楚係唔係想解約，費事阻住佢前程喎。最後係咪真係冇糧出，就佢自己先知」

帶阿媽求情

據知許亦妮自去年聖誕節後已冇工開。自知闖禍的許，兩周前更帶同母親返大台向樂易玲求救。有大台員工指她當時「死晒狗」，猛叫樂小姐「幫吓手」。但據知樂小姐今次難得與珊姐諗法相同，認為要對許亦妮施小懲大誡。兩大巨頭聯手打壓，許亦妮羊年想有運行？睇怕都幾難！

新生代是非精

出道僅 3年多的許亦妮算是港姐中比較多人識，皆因她參選港姐以來都是非纏身，負面新聞不斷，想唔記得她都好難。

連𠝹13仔

11年參選港姐期間已被爆是「人肉發電機」，專黐富二代及連𠝹13仔成為姣精之冠；更有指她在英國讀書期間向十多位同學借共逾 10萬港元唔還。

針對邦民女

去年拍《街頭魔法王 2》時被指與 Anjay（陳嘉寶）針鋒相對，及遲到兼唔跟稿。

拍戲扮大牌

前年拍《喜愛夜蒲 3》時扮大星犯眾憎，惹另一女角 Jeana及「寸嘴 Barbie」夏蔚喻不滿，夏更曾公開寸她：「依家啲港姐真係大晒。」

網民嫌樣衰

12年拍《老表，你好嘢！》時，因表情浮誇，眼凸兼藐嘴，被網民一致圍插「恐怖」。

鍾意就快D Share啦！

下一篇 》