馮仁昭四圍超：祖名私家機返台搵阿嬌 - 馮仁昭
【祖名毒禍之 行蹤神秘】房祖名喺北京因容留他人吸毒刑滿出獄，前日喺當地開完道歉記者會，閃縮飛車到機場離開內地，有傳祖名搭夜機去台北，大批記者喺桃園機場守候，但航班抵達後唔見祖名身影，至於香港機場亦都有傳媒駐守，但一樣撲空。
據知，祖名前晚原來搭爸爸成龍嘅私人飛機到台北，因為申請咗特殊通關入境，成功避過傳媒耳目鬼祟離開機場，消息話祖名為避記者追訪，特登唔返自己喺台北信義區嘅豪宅，而係去咗另一個私密地方同媽咪林鳳嬌團圓，由於祖名嘅阿姨、經理人都住喺台灣，有多處落腳地方，想要避開記者真係話咁易，據聞經理人公司交代祖名呢排唔好出街，要買乜都搵工作人員代勞。
■據知房祖名搭爸爸成龍嘅私人飛機返台北，同媽咪林鳳嬌團圓。資料圖片
柯震東嗌加油
對於祖名出獄重獲自由，之前一齊被捕嘅柯震東回應：「私下有傳簡訊給他了，未來一起加油。」好友郭采潔噚日透過經理人話：「已經在記者會後跟他通電話，想說的都在電話裏說了，未來，他會成為更好的人。」
撰文：馮仁昭
■祖名前日喺北京開完道歉記者會後，即閃縮飛車去機場離開內地。
|
鍾意就快D Share啦！
|
|
|
