掃呢頁CODE去手機

2015年2月4日 星期三

[FACE - 402] 瘦到病  2歲 Torres源頭 流感千嬅尾場病住撐 千嬅,楊千嬅,MF,




千嬅有老公丁子高孖住同台演出,跳都跳得落力啲,咩病痛當堂冇晒

真面目

瘦到病  2歲 Torres源頭 流感千嬅尾場病住撐

上週六( 31日),一連七場《楊千嬅 Let's Begin2015世界巡迴演唱會》完美結束,尾場除咗有林海峰、陳奕迅同梁漢文撐場外,仲有老公扮 dancer突襲,夠晒驚喜。

唱足 7場,剩番唔夠 100磅嘅千嬅繼續豁出去,不過實情有苦自己知!原來去到第六場時,千嬅染上流感,而源頭就係 2歲愛兒 Torres,搞到鼻塞兼聲沙,尾場靠意志頂硬上,所以唔怪得平時鍾意大聲講大聲笑嘅千嬅,連講句嘢都要就住就住

七場演唱會,每晚嘉賓都有驚喜,唔少仲同千嬅傳過不和,好似鄭秀文、容祖兒等,所以事後都有傳話千嬅係借演唱會而泯恩仇,尾場 Wyman黃偉文台上獻花一幕,兩人更加眼濕濕。

雖然丁子高晚晚都喺紅館撐千嬅,不過尾場突然現身台上,成功冧爆老婆,仲喺 instagram話突襲成功添!

尾場千嬅病情開始嚴重,不時要工作人員拎水畀佢飲,體重剩番唔夠 100磅,應該係千嬅入行以來最瘦。

見到千嬅枱前一大堆藥就知病情都唔輕,所以平時鍾意大聲講大聲笑嘅千嬅喺後台同工作人員講嘢,都係細細聲㗎咋!

陳奕迅同梁漢文擔任千嬅演唱會表演嘉賓,三人重組華星三寶合唱〈大激想〉,勾起觀眾唔少集體回憶。

有指千嬅借今次演唱會泯恩仇,除咗鄭秀文、容祖兒外,尾場仲有傳過不和嘅 Wyman,佢當晚着住一件印有一個男孩圖案嘅衫,正正代表兩人結緣之作〈野孩子〉,意義十分重大,所以千嬅最終都感動落淚。

林海峰都係以神秘嘉賓身份上台,千嬅見到之後仲爆響口話:「嚇死我喇,我以為你放緊生日假。」 Jan就話:「我好想睇你演唱會,問工作人員有冇飛,工作人員話爆晒,咁我嚟到,就推咗我上嚟。」搞到千嬅笑到見牙唔見眼。

千嬅唔只又跳又唱,其中一幕仲玩埋豎琴表演,觀眾都好 buy㗎!

生日要隔離

千嬅頭場演唱會,老公丁子高仲帶埋仔仔 Torres、外父、外母一齊撐老婆,當時千嬅老豆仲未被 Torres傳染流感!

辛苦操足一年時間,開騷前楊千嬅體重減到得番 100磅,身形史無前例咁 fit,仲好夠氣又跳又唱,去到第三場,同舞王郭富城比舞,體力一樣冇問題。

不過去到第六場,千嬅就被囝囝 Torres傳染流感,後來連老豆都中埋招,搞到千嬅係屋企都要帶住口罩,瞓教都冇得除低,免得傳染埋畀老公丁子高。受流感影響,最後兩場都要食藥,尾場更加病住撐。本週二( 3日)就係千嬅 41歲正日生日,原本想攬住囝囝 Torres過生日,不過睇嚟𠵱家都要繼續隔離,遲啲先有得攬!

‘ 15紅館陽盛陰衰

15年紅館繼續星光熠熠,緊貼千嬅就有老將朱咪咪,不過之後就係資深男歌手嘅天下,有校長譚詠麟 40週年演唱會、仲有安仔婚後第一個演唱會添!

朱咪咪 6-7/2

譚詠麟 13-24/2

杜德偉 27-28/3

許志安 1-3/5

太極 5月

林俊傑 6月

梁漢文 8月

李克勤 9月

鍾意就快D Share啦!