出席活動公開對唐詩詠有好感當晚（上月 27日），洪永城返回鯉景灣後發現記者，令原先約會女友大計冇望，速速轉 plan，兩人同時 call救兵做「分頭食」大龍鳳。
封面
撞破送上門 急 call救兵 洪永城唐詩詠偷情式熱戀
熱戀扮唔熟、拍拖扮分手、明明註咗冊就話「結婚一定會通知大家」，睇得多娛樂新聞，唔好話俾我知你仲信藝人把口！最近大話王又多一個洪永城，上年暑假開始同唐詩詠傳緋聞，爆響口話想追女方。你以為佢誠實？實情拍拖三個月、電視城內一早通晒天！
既然開咗個頭，惟有一個大話再冚另一個大話，上週女朋友一場嚟到洪家鯉景灣，明明係送上門撐枱腳，洪永城都因為怕被記者撞破，急 call朋友做大茄，一餐飯各自臨時臨急一個街頭一個街尾分開食。這麼遠那麼近，真係有情趣啲？
明顯情侶通常都係俾人踢爆在先，冇得唔認在後。有辦你睇，黃翠如同蕭正楠公開戀情後不知幾恩愛，仲唔多唔少幫到套定情大台劇收視。相反好兄弟洪永城就鍾意化簡為繁，明明去年八月已經傳拍拖、踏入熱戀期，日前至懶誠實公布要出力追求，把口 delay過事實成季！
大龍鳳
無論係追緊人定拍緊拖，約食餐飯仔又有幾閒。上週二（ 27日），洪永城活動後返回鯉景灣住所，在樓下蘇豪東各式餐廳門口逐間研究餐牌，明顯係篩選餐廳約女朋友食餐好嘢。不過警覺性高過人、又怕戀情見光死，睇睇下西班牙菜、意大利菜，途中卻發現記者影蹤，最終走入日本餐廳，一坐低唔睇菜牌先，第一時間又打電話又寫短訊。
十分鐘後，男性友人應召出現，二十分鐘後，唐詩詠亦都現身。又話追求中、又話好朋友，邊個好朋友會經過食店連招呼都唔打個？家住將軍澳清水灣半島飛撲到鯉景灣，不過臨門一腳又係急 call應召女性友人，轉 plan走去食泰菜。為乜搞到一餐飯要食到一個街頭一個街尾？真係呢對情侶先至明。
經過扮睇唔到
愛的印記
一時話想追、一時又改口了解中，無論點講都好，洪永城係唔肯講事實。其實二人早於去年 8月已經傳撻着，到 11月正式行埋，仲有人證有物證添！
撈亂櫈
其實去年初拍《載得有情人》首次合作情侶，已經有傳 31歲洪永城放棄林夏薇，轉冧 33歲唐詩詠，八月仲被拍到同遊赤柱。
九月劇集出街、為宣傳日見夜見，兩人愈行愈埋；到十一月《張保仔》拍得如火如荼，更俾服裝阿姐發現冇份拍套劇，陪住洪永城開工的竟然係唐詩詠張御用摺椅。工作人員轉述洪永城死撐：「邊係啫！啲櫈張張都一樣！」可惜唔夠服裝阿姐眼利又企硬：「冇可能！呢張明明係唐詩詠嗰張！」自此洪永城與唐詩詠的情侶關係即成電視城熱話。
「儲 3000 like就公開」
緋聞一早開始傳、戀情又先行在大台見光，照計有幾個月適應期，公布戀情一啲無難度。勢估唔到洪永城唔等拍拖相曝光、本刊記者早前曾當面提問，洪例牌回應答：「唔係拍拖……佢去咗馬來西亞嘛！（你又知得咁清楚？）佢當然係好女仔啦，我哋係好朋友嚟！」
至上週二（ 27日）見記者再先行自爆，不過唔係爆戀情：「我哋有共同話題、又一樣鍾意食嘢，我對佢有二、三百個 like，儲到二、三千個 like就公開。」呢頭表白完嗰頭有記者電話訪問佢即改口：「美麗的誤會呀，我係話大家了解中、唔係發展中！」即係點？去下停下，又再倒後退幾步，洪永城啲步伐好難捉摸喎！
食家精選
今年 31歲的洪永城外表純情，但其實係正牌食家，女友種類各式其適，連大台姐仔都逃唔過佢手指罅！
大話龍鳳排行榜
第一位 秘密結婚劉德華
都話呢個世界無聖人，連娛樂史上最好形象兼民間特首劉華都試過被揭隱瞞已婚。
第二位 婚前生 B黃貫中
開口埋口話自己同女朋友朱茵係虔誠基督徒、沒有婚前性行為，不過 12年就先懷囡囡黃鶯再結婚。
第三位 純粹做戲王祖藍
大台台慶史上第一次玩求婚，祖藍跪地、亞男喊晒，但有冇人解釋到分秒必爭嘅台慶點解九點半黃金時段可以玩突發先？
新人王 斷正唔認周子揚×何傲兒
講大話、做大龍鳳唔係一線藝人專利，大台新人周子揚同何傲兒熱戀兩星期後公布分手、分手兩星期後又拍拖首爾，至係龍鳳戲班最有前途接班人。
|
鍾意就快D Share啦！
|
|
|
