無綫劇集來來去去都係同一班人，已經搞到觀眾好亂架啦。好似今期林夏薇，佢同時喺《衝線》同埋《天眼》出現，有時都分唔清佢幾時係Hilary，幾時係Scarlett。去到噚晚仲要連搗亂橋段都撞埋，睇到都唔知邊套打邊套。
無綫自己啲劇撞橋成日都會出現，但係今次係同一日撞喎，呢個難度分簡直有9.9呀！而家播緊嘅《愛•回家》同《天眼》唔知係唔係同一個編劇，竟然可以咁啱用屎蜢搗亂情節。
《愛•回家》噚晚就講到馬強(徐榮飾演)去咗幫鍾標(趙永洪飾演)做擔保人，洪爺(李家鼎飾演)懷疑馬強爭人錢，搞到俾人用屎蜢拋入舖頭搗亂。
而《天眼》方面，噚晚就講到吳佐治(于洋飾演)想向Richman(泰臣飾演)報復。佢就去咗買草蜢同埋入廁所，之後被Jan(楊怡飾演)發現，Jan去咗同Richman講，希望佢可以同佢老豆佐治say sorry，本身佢應承咗，不過反口仲用說話刺激佢。搞到佐治喺放屎蜢搗亂前，就被人捉咗返警署。
唔知中途行開咗嘅觀眾會唔會以為執到寶(馬強間舖)啲屎蜢係佐治放呢？其實唔同劇集都用屎蜢做橋已經有難度，而家仲要同一日，真係夾都無咁橋呀！
不過要數最經典一定係上年嘅《大藥坊》同埋《再戰明天》，一套民初劇一套時裝劇喺同一晚播出強姦片段，仲要係同一個人(黃煒溏)分別喺民初試圖強姦高海寧，再返現代強姦石天欣。神奇！
受害人1號︰高海寧
成日被姦的石天欣…
成日姦人的黃煒溏
圖片：劇集截圖
|
鍾意就快D Share啦！
|
|
|
