插圖：詹震寰
八卦陣
袁志偉擦鞋 唱好 HTC
CCTVB新聞部近年成日俾人話擦北京鞋，大部分同總監花哥袁志偉有關，今次亦唔例外，不過花哥擦鞋嘅對象唔係北京，而係 TVB其中一位大股東、台灣智能電話生產商 HTC董事長王雪紅。
話說花哥多年前定咗規矩，就係唔會點做科技產品新聞，因為鱔味太濃似賣廣告，即使 Apple年度發布會都唔會大做。但上星期一花哥落柯打，指明要做 HTC發布新機，據聞當日編採會議有人問過點解，花哥當堂黑面，最後當然無人敢推。
原來上星期巴塞隆拿舉行世界流動通訊大會，各大智能電話廠商都趁機介紹新機，但 TVB新聞單單報導 HTC新機發布會。或者花哥唔係想幫部新機賣廣告，亦知道廣管局《業務守則》已白紙黑字禁止，所以呢條題為「 HTC發布新手提電話」嘅新聞完全無介紹過部電話，重點反而係王雪紅一句說話：「若果未來手提電話廠商只能剩下兩間，其中一間必定會是 HTC。」擦鞋擦到咁高層次，認真厲害。
新聞部怕雨遮 大減本地實習記者
早前有報紙專欄大爆 TVB新聞部大減實習記者名額， cut到剩番八個位，當中一半俾內地生，其餘分別俾咗兩個科大非新聞系學生，同埋樹仁、中大新聞系學生各一，換言之，浸大、港大等各大院校新聞系通通無份。
根據 TVB嘅官方解釋，新聞部每年提供四個 intern職位俾內地大學，但查實 TVB以往每年會請大約廿個 intern，浸大、樹仁通常分到四至五個，今年明顯係向本地生開刀。
點解針對本地生？知情人士向本刊爆料，話 TVB內部流傳，以後新聞部請 intern又好，新人又好，都要提防佢有無雨傘背景，或者態度有無受雨傘運動影響。試問喺雨傘運動期間走在最前嘅本地大學生，又點會啱堅持「中立」嘅花哥心水呢？
民建聯鴨王 招待權貴
習近平上台厲行節約， 689今年連駐京辦兩會酒會都要取消，但建制派第一大黨民建聯，上週四元宵節喺該黨顧問、僑福建設老闆黃建華名下嘅芳草地筵開二十席，宴請喺北京開會嘅人大代表、政協委員等，排場卻當領導人無到。
前年聯歡宴一人一支茅台、又有日本空運新鮮金槍魚、涮羊肉供應，搞到被人篤背脊話擺豪門宴，民記舊年大為收斂，只供應涼菜、小籠包；不過今年故態復萌，豪食象拔蚌、海參及大董烤鴨，後者係烤鴨之王，美國總統夫人米歇爾陪同奧巴馬舊年訪華時指定家宴選擇地點，民記唔通唔怕俾人鬧勾結外部勢力？
舊年豪派平板電腦，今年繼續照派，但包裝再無用大到一呎乘呎半大盒裝載，堆到「成座山咁誇」，而係用環保袋裝載放喺地下。不過板腦裡面有唔少包括介紹黃建華收藏品嘅短片，廣告味道似乎濃咗少少。
民政局新政助 又係民記友好
民政事務局政治助理徐英偉即將離開梁班子，盛傳佢回巢擔任民建聯總幹事。政界流傳局長曾德成拒用民記人，打算搵個具青年工作經驗，但又唔係來自任何政黨或傳媒行業嘅後生仔接任政助，更有傳當事人正是本身係大律師嘅青年事務委員會委員范凱傑。
現年廿八歲嘅范凱傑無乜名氣，但份 CV的確嚇得吓人，既係香港青少年領袖發展協會創會會長，又係香港模擬立法會創辦人，攞過 N咁多個優秀青年乜乜乜嘅獎項，睇落似乎乾乾淨淨，之不過翻查記錄，原來佢曾任大埔青年協會副秘書長。
大埔青年協會係乜？新界青年聯會嘅直屬機構之一，即係民建聯嘅極度友好機構。六年前，校園驗毒議題熱爆，大埔青協搞咗個調查，話七成受訪學生願意參加驗毒，咁啱得咁蹺，時任大埔青協主席就係現任民建聯中委兼大埔支部副主席譚榮勳，陪伴在側搞記招嘅得兩個人，一個係范凱傑，另一個就係力撐驗毒嘅民建聯立法會議員陳克勤。范凱傑同民建聯嘅關係？不言而喻啦。
|
鍾意就快D Share啦！
|
|
|