真人騷
潘源良的解碼遊戲 最愛是誰？
烈日當空，酒店餐廳裡，別人忙着在 buffet bar裡拿食物，我點了咖啡，潘源良的要求則是一杯紅酒，再加一支香煙。
對上嗰次，遇到受訪者中午就要開瓶紅酒的，是吳綺莉。
人物不一樣，但都揹着一身的故事，吳綺莉喝的是愁緒， 55歲就一頭白髮的潘源良抿到嘴裡的則是情懷。
二十年前、上個世紀，廣東歌最輝煌的年代，潘源良是最高產也是最當紅的詞人之一。我不會形容他是「一代」詞神，因為即使過了二十多年，他的詞依然嗒落有味一點沒有過時，前題是，要把他和李麗珍的愛情故事代進歌詞裡。
86年他為了 17歲的珍妹拋棄元配，寫下了林子祥的〈最愛是誰〉：「留住愛亦留住罪 誰料伴你的心今已碎 卻有她在夢裡」。
20多年後她與珍妹再續前緣，寫下了林憶蓮的〈時光本是無罪〉：「時光本是無罪 你說當初已失去 其實尚可和我努力重新追 也許 哭著重聚 會再生歡笑花蕾 能代替這結束之旅 回不去」
潘源良說：「詞人不可以淨係寫自己嘅故事，唔係好易乾塘。」
潘源良也說：「我不會用幸福去形容呢一刻，好誤導，只可以講，呢一刻屬於我哋。」
直到訪問最後，他悄悄告訴我，有一首歌最能形容現在的潘源良和李麗珍，那首歌也是寫於 86年，熱戀珍妹那一年。
填詞係個解碼遊戲
點解會有呢個作品展（ 6月中紅館兩場）？
三、四年前已經有其他主辦單位搵我，但係我一提我想要嘅嘢，就都傾唔成。我唔想太懷舊、唔想變咗麗花皇宮一樣，我想參與嘅人有新意有角度，但我一講，佢哋（主辦商）就走……我想新晉啲、後生啲嘅歌手都可以唱一部份，今次終於傾得成，除咗合作開嘅歌手唱番經典，都有二汶、一峰同 C AllStar。
點解要有年輕歌手？
好似對唔住我啲歌手朋友咁：嚟啦你哋，你哋只要肯嚟唱番啲舊嘢就夠殺㗎喇……我感覺對大家都唔好。我想件事有多啲元素，唔想淨係緬懷，我成日都覺得，我哋八、九十年代嘅歌曲創作人係好幸運嘅一群，借呢個機會同呢一輩嘅交流，件事有意義啲。
係怕俾人話過氣、食老本？
我唔諗過唔過氣先，係件事我自己都完全唔興奮。如果啲後生一聽潘源良就覺得係上兩代嘅人，咁咪唔好買飛囉……呢啲唔到我講。
同有部份歌手，比如林憶蓮，點解咁多年都繼續寫，你都咁明佢？
呢啲係緣份，由第一隻碟開始，可以咁講，我係睇住佢大，由一開始嘅朦豬眼，到咁多年一路發展歌路越嚟越闊，喺香港係幾難得。佢當然係我其中一個 favorite，講落幾好彩，我同每個歌手第一次合作已經爆，張學友〈情已逝〉、譚詠麟〈愛情陷阱〉、林子祥〈邁步向前〉，仲有憶蓮嘅〈愛情 I Don't Know〉。呢個機緣同默契好緊要，我唔使再浪費時間去捉路。
當你收到一首歌，知道係寫俾邊個歌手，首詞係點樣誕生？
其實連見面連傾偈都唔使，我哋已經用緊音符溝通緊，佢俾呢首歌我，自然有佢嘅原因，我稱之為一個解碼遊戲。我聽過憶蓮要求好高，好多時收嘅詞一改再改，我嘅感覺係呢個詞人捉唔到個情緒。我知呢個詞人已經好資深（講緊林夕為憶蓮填〈再見悲哀〉改足 8次），呢個絕對唔係技巧嘅問題。唔好以為心目中有個故事夾硬擺落去啲旋律度，咁就變咗亂碼遊戲，唔係解碼遊戲喇。
拍戲醜婦終需見家翁
最當紅嗰十年，換着風水師嘅講法，即係行緊大運。
你講，我係有啲唔正常……嗰段日子確係冇享受過，除咗想做好啲，冇諗過掌聲，呢方面我覺得係我一種缺失，我冇享受、亦唔夠進取，所謂雄霸兩個字，從來都冇諗過。所以當九十年代尾冇人搵我，我都冇去敲門、問下人點解……我諗好多因素，市場係其一，有啲決策嘅人又想改朝換代，唔係我可以解決嘅嘢。我當初諗法同後來發展係有啲唔同，我當時諗大陸市場開放，台灣內地咁多人寫詞，可能會少人搵。原來唔係，廣東歌原來都有幾大容量，係嗰陣時有其他人冒起啫。
廣東歌嘅輝煌期過咗，你做過嘅亞視都執埋，港產片一樣沒落，全部俾你遇到。
都係，好多改變，香港係一個好多嘢睇、好多嘢學嘅地方，睇下我哋有冇比心機學。
唔同時期嘅你學到啲咩？比如麗的做 PA、做導演嘅年代？
嗰陣時每日都係得一兩個鐘頭瞓㗎咋，踩起上嚟好多日冇得返屋企。最辛苦嘅年代亦都係學得最多嘢嘅年代，每個年青人都應該係咁樣開始，基礎同經驗都係咁樣返嚟。
最當紅嘅填詞年代呢？
填詞係一個不斷組織同總結嘅過程，將生活感受組織、總結然後創作成歌詞，本來就係一種學習。
咁拍戲呢？
導演好多未必預計到嘅事情，寫歌唔會有好大嘅失控。好似我對上嗰次喺深圳拍戲（張栢芝、權相佑主演的《影子愛人》），都係日頭花十幾個鐘拍，夜晚再跟其他嘢再改劇本，我付出嘅心血唔比麗的年代少。
結果不似預期，俾人當爛片，會唔會失望？
我唔想將個責任推喺某啲人身上，好多根本嘅問題存在再加上好多突發問題。我上去前連完整劇本都冇，淨係得個故事大綱同簽咗約嘅男女主角……失望當然有，但係必須要承認，好多問題當下解決唔到，醜婦都終需見家翁。
仲會唔會做導演？
有同人傾緊，我份人係未發生嘅嘢唔會講住。呢啲故仔係我自己諗自己寫。
呢一刻屬於我哋
你應該將你同珍妹嘅愛情故事拍成電影。
搵唔到人做喎，哈哈……等我搵到一啲有我哋氣質嘅演員先至諗
你嘅氣質即係？
講笑啫，我諗我會多謝你咁講，有人想睇，但可唔可行呢？搵唔搵到人拍呢？老細肯 buy至得。
你好多詞套入同珍妹嘅愛情故事都好啱用，好似離婚時寫嘅〈最愛是誰〉同廿幾年後再復合時寫嘅〈時光本是無罪〉。
你唔好以為我寫歌同寫日記一樣至得㗎，創作人一定唔可以咁，唔係一定好快乾。有啲記者同我講，我潛意識叫我咁寫……咁去到潛意識，就唔係我控制範圍啦。
係唔係真係如傳聞中所講痴痴等咗廿幾年？
咁又唔好咁講，癲婆搵仔咩！緣份囉，我哋嘅故仔暫時係咁樣發展。
呢個狀態你會唔會形容為幸福？
我唔會用幸福呢兩個字，好誤導，個個人對幸福定義都唔同，我係 open嘅，唔會埋單計數住，只可以講，呢一刻幾屬於我哋。
點為之屬於你哋？
我做我自己，佢又做佢自己。廿幾年前我哋好多嘢都唔識，係要好多時間去學。
所以其實你同珍妹係用咗廿幾年嚟認識自己？
係呀，呢個過程其實係認識自己多過認識對方。
有冇一首你嘅詞可以形容你呢一刻嘅感情狀態？難道係〈愛情陷阱〉？
我寫〈愛情陷阱〉係 84年，都未識李麗珍，識珍妹嗰年係 86年。我鍾意嘅又未必係自己嘅歌，〈風繼續追〉（鄭國江作詞），呢首係一首奇歌。
|
鍾意就快D Share啦！
|
|
|