熱爆娛樂: 口味好難捉摸　樹仁新聞系 Vika：最鍾意影枱腳 [FACE - 412

2015年4月15日星期三

鄭曉欣 Vika　 21歲　樹仁新聞及傳播學系 Yr.2

問 Vika有咩夢想，佢話想攞住部相機影勻全世界，搞到記者都想放假陪佢去。

前大台大茄周家怡捱足廿年終於捱出頭，在港視《導火新聞線》飾演前線新聞記者方凝獲網民激讚，同樣喺樹仁讀新聞及傳播學系 Yr.2嘅鄭曉欣（ Vika），本身滿懷希望想做主播，但克服唔到面對鏡頭就口窒窒的障礙，最後惟有放棄呢個念頭。

不過 Vika冇後悔揀咗新聞系，「我覺得𠵱家讀緊咩同將來職業都唔係好關事，況且新聞系唔一定得主播一條出路，仲有其他好多例如拍片、微電影、平面設計、攝影，統統都係我有興趣想學嘅，所以冇所謂」

即興唔係齋噏，有次 Vika睇完韓劇想去韓國首爾旅行，結果三日內搞掂晒機票酒店，一個人飛咗過韓國。兩個字：其實唔難。

除咗攝影， Vika都好鍾意畫畫，心情靚嘅時候可以仔細到連隻鑽石戒子有幾多切割面都畫埋， Ok You Win！

咪以為影枱腳冇人識欣賞，好多同學都拎佢啲藝術相嚟做 wallpaper，有位同班同學仲專登搵 Vika幫自己父母影 25週年銀婚紀念相添！

雖然 Vika做乜嘢都好睇心情，但同學反而好鐘意佢，因為覺得佢份人夠即興，即日約佢出街一定唔會托手踭。

但大家懂的，女人從來都係口不對心， Vika都唔例外，「俾我揀多次，我都係想讀 Art多啲，因為我好鍾意藝術，尤其係攝影。我覺得將啲好平凡嘅嘢影到好靚，就已經係藝術嘅一種，所以我好少影人像，反而鍾意影吓啲枱腳櫈腳、花花草草咁，愈平凡影到佢哋愈靚就愈有成功感！」影枱腳？女神啲藝術細胞果然好難捉摸。

鍾意就快D Share啦！