2015年5月14日 星期四

女版金秀賢 有排復仇 [壹週刊 - 1314] 金秀賢,M1,



一講金秀賢諗起都敏俊,而家有多一個索女,叫呢個名至少有一個共通點,就係長腿!

日韓到會

女版金秀賢 有排復仇

際遇嘅嘢好奇妙,運氣話嚟就嚟,憑住一部作品,可以一夜走紅,蜚聲國際,好似金秀賢。

啊,我講緊嘅,唔係做《來自星星的你》外星人都敏俊嗰個金秀賢呀,係《復仇者聯盟 2:奧創紀元》飾演生物細胞專家 Helen Cho嘅韓國索女金秀賢( Claudia Kim)呀。

同男神撞名,曾經為金秀賢帶來不便,不過而家水漲船高,成為國際女星,角色未死,喺 Marvel往後作品亦有重要性,有排玩!

改四次名

女版金秀賢已經 30歲,畢業於梨花女子大學國際學部,身高 177cm,典型 model咁嘅身形, 2005年喺韓中 Super Model選拔大賽奪得第一名,之後接拍過多個平面廣告。一心想做演員,出道之後開始以尤利兒呢個藝名接拍電視劇, 2006年憑住電視劇《遊戲女王》奪得 SBS演技大賞新星獎,當時男版金秀賢仲未出道,女版金秀賢以為星途一片光明,咪用番原名囉,打算全職投身電視圈。可惜發展平平,仲跑出一個同名同姓嘅男演員,人哋迅速走紅,佢為免混淆,只好改叫秀賢,不過事業依然未見起色。喺韓國無機會,唔夠後起嘅妹妹仔爭食,於是把心一橫去外國發展,去得外國仲叫金秀賢?改個好聽啲嘅英文名,就係 Claudia Kim喇!

做性感尤物嘅好處,就係可以喺紅地氈上搶鏡,喺美國首映時,仲有一陣神來之風幫一把,幾誘人。

據說金秀賢出身豪門世家,難怪散發出一種富家女氣質,自小喺美國生活,而家要同外國人相處都完全無問題。

暗戀雷神

金秀賢喺大學讀國際研究,從小喺美國生活,英文完全難佢唔到。上年,參與演出《 House of Cards》出品商 Netflix的美劇《 Macro Polo》,其間喺美國不斷試鏡,包括《復仇者聯盟 2:奧創紀元》。據知試鏡嘅有成 40個女演員,當中更加有一線阿姐,個個都想爭取機會加入英雄大家庭,最後中選嘅竟然係名不見經傳的 Claudia Kim?吓?邊位呀?導演喬斯溫登之前講過,《復仇者聯盟 2:奧創紀元》第一場戲喺韓國開機,需要一個韓國女演員做 Helen Cho,見到 Claudia外形已經覺得好適合,加上一口流利英文,簡直係不二之選!喺電影入面飾演科學家,俾奧創逼佢製造出幻視,更加有少少暗戀雷神嘅感情線,令人留下深刻印象。拍完呢套荷李活大片,相信片約會陸續有嚟!

《復仇者聯盟 2:奧創紀元》喺韓國有一場好重要嘅戲,導演特別重視韓國市場,仲喺韓國搞記者會,讓金秀賢返主場。

金秀賢喺《復仇者聯盟 2:奧創紀元》飾演研究員,係片中唯一一個亞洲演員,戲份多過《鐵甲奇俠 3》的范冰冰,好多。

轉戰海外

金秀賢喺《復仇者》入面戲份唔少,但唔需要超凡演技,只要靚靚女女企喺度講台詞。呢類型嘅花瓶角色,佢喺韓國都做唔少,喺《逃亡者 Plan B》中扮演秘書,一年後喺電視劇《 Brain》中扮演富豪千金,仲有《七級公務員》嘅間諜,基本上都只係三、四線,佢都毫不吝嗇美好身材,甚至以性感水著上陣,非常搏殺。不過時移世易,金秀賢今日炙手可熱,身價漲升幾十倍,以前佢拍平面廣告,名都無,而家佢就可以同元彬合作,仲成為國際化妝品牌 Bobbi Brown嘅代言人,風頭一時無兩。嚟緊金秀賢會返美國,繼續拍攝《 Macro Polo》第二輯,有傳韓國有好多電視台都想搵佢拍戲,可惜要等到下年至有期,唔知遲啲有無機會見到兩個金秀賢合作呢?

拍完《復仇者》,即做化妝品牌代言人。

金秀賢同元彬一齊成為服裝品牌代言人,幾年前,邊諗到有今日。

喺電視劇《 Stand-by》以水著上陣,最後仲攞咗情景喜劇類別嘅優秀獎。

上年金秀賢參與美劇《 Macro Polo》,講 Macro Polo在忽必烈王朝發生的一系列故事。

金秀賢都拍過唔少動作片,原來之前成龍曾經搵過佢試鏡,不過佢推咗。

金秀賢同好多藝人一樣,鍾意用社交網絡同觀眾溝通,佢上載咗好多相,好似同車勝元同秋成勳合照等等,證明自己無忘記祖國。

鍾意就快D Share啦!