2015年5月14日 星期四

紅館睇騷 走入顧嘉煇後台重地 [壹週刊 - 1314] 顧嘉煇,M1,



唱完返入後台,秋官先飲水解渴。

探熱針

紅館睇騷 走入顧嘉煇後台重地

上世紀有過無數經典金曲作品的顧嘉煇,一句榮休即爆 12場,一票難求情況,同 Sammi冇兩樣;煇哥開騷更加一呼百應。壓軸出場的秋官阿姐,每天傍晚七點前必到紅館準備,丁蟹重現的鄭少秋,有老婆官晶華跟實,後台打點;同場演出嘉賓羅嘉良、謝安琪,亦有黐身老婆蘇岩和跟得老公張繼聰陪住,一啤啤,塞滿紅館後台。

望住 B餐唔眨眼

九十年代,有全港樂壇一線紅歌手串場的煇黃演唱會,比年度頒獎禮更墟冚,老拍檔黃霑走咗,得番顧嘉煇一支公,依然叫座力驚人。觀眾席上,坐滿大班聽煇哥作品長大、平均年齡五張起的觀眾,還有前來捧場的資深歌手,亦在後台聚舊。

《大時代》重播,今期人氣王丁蟹鄭少秋,有老婆官晶華全程留守化妝間打點一切,老夫老妻,依舊秤不離鉈;而結婚五年的羅嘉良、蘇岩,亦孖咇出動,二人不時在後台的走廊行來行去,會陪住羅嘉良行到去台底準備出場的蘇岩,更不忘幫老公搽 cream,體貼又黐身。

同樣唱足十二場的謝安琪,一樣有老公張繼聰陪住打氣,在後台望住電視中的「私家 B餐」,唔眨眼。

秋官被 dancers扶住企高,英爆!

加場又加場,顧嘉煇榮休,一班中年擁躉,空群而出。

行入房時,秋官唔小心踩到長褸,他即嚟個大俠轉身,反應好快。

官晶華全晚留守秋官化妝房,低調打氣。

被蘇岩繑住唔放的羅嘉良,表現風騷。

出場前,蘇岩體貼地幫老公搽潤膚霜,務求羅嘉良以最佳狀態上台。

演唱會尾聲,謝安琪準備隨隊上台大合唱,老公張繼聰從後跟實。

老婆出咗場,張繼聰在後台釘住電視機唔行開。

主辦之一的丘亞葵傍住主角顧嘉煇出場。

阿姐賣廣告

群星拱照顧嘉煇,但高潮位始終是壓軸出場的汪明荃、鄭少秋,一個六十七一個六十八,但載歌載舞,絕無欺場。

阿姐唱《心債》時,踩住高踭鞋不停自轉,乘機硬銷孭飛劇《華麗轉身》。

「啲人話我不停轉,佢哋好暈,其實我呢個係華麗轉身!」秋官亦唔弱,與十數 dancers共舞兼被捧起擺大俠甫士,全場觀眾起哄。

隨時可一不可再,一班耆英粉絲,蟻步慢行紅館攞命樓梯,都要參與其中,八十二歲顧嘉煇,榮休實至名歸。



頭上的扇形髮飾,又大又重,阿姐不時要托住行。

台底支架多,阿姐要𠌥低身再㩒低頭上把扇過,少啲定力都唔掂。

不停華麗轉身的阿姐,為谷劇借機賣廣告。

張敬軒與前輩陳潔靈好好傾。

老花 2800度,視力只剩兩成的葉振棠,要用放大鏡睇電話。

演唱會尾聲,顧嘉煇上台指揮群星合唱。

鍾意就快D Share啦!