真人騷
孝蟹恨復出 乜都夠膽講 51歲邵仲衡：要有 quality先有人記得㗎
一套《大時代》，讓全城對一眾娛圈失蹤人口再生興趣。
不過以失蹤人口嚟計，邵仲衡蒲頭後曝光一枝獨秀，重播首週「孝蟹」都仲未出場，已經連做廿個訪問，電話一打通，佢第一句就係：「廿個訪問有十個叫我上天台，今次唔上天台得唔得？」
出鏡比活躍人口更活躍，邵仲衡都認，有兩個原因。
第一， 87年入大台、 94年離巢，拍劇年代兼職經營室內設計生意，向外闖去咗開越野車專門店，當紮時唔恨，到𠵱家搵到唔使做，佢先話恨復出。
「你唔專注，製作人睇得到，觀眾都睇到。我做戲，有乜理由講車啲版位仲大過上娛樂版？以前錯過，我唔想再錯。」
第二，爆大鑊話全民公認頂級超卓好男人劉青雲撬牆腳、人品麻麻，踩三屆視帝黎耀祥演技，又唔怕俾人知當今 I.T老闆娘邱淑貞係舊愛，夠膽講到咁，梗係日日有報見。
「係就係，唔係就唔係，照直講啫。嗰啲人對你哋嚟講係巨星視帝 whatever，同我係同期出身，我都係觀眾嚟㗎嘛，有權講㗎！」
我索到浸霸氣！正是丁家四兄弟，唯獨大佬孝身上至見到嘅霸氣：「好感恩，今時今日仲有咁多觀眾記得我，不過都要有啲 quality，先有人記得㗎！」
雖然已經 51歲，肥咗三個碼（近日為健康減肥廿磅），啲霸氣竟然仲喺度。
但請留意，霸氣又唔等同燥狂，「如果唔走一早做咗乜做咗物」又絕對唔會出自邵仲衡把口：「同樣角色同樣機會，遇着我可能甩轆呢？自己嘅人生嚟㗎嘛，我都係順住條路行啫，有咩好後悔？」
做咗幾十年人，唔通亂噴咩？
幾時開始再起戲癮？
電影《點對點》。之前港台都搵我，但我實在頂唔順……叫我做個朝早耍太極、會教人嘅阿 Sir喎，我都唔係嗰啲人。《點對點》開頭大家都雪中送炭，冇收咩錢，跟住錦上添花有陳豪，就變咗陳豪復出影壇第一炮，但呢啲又唔怪得電影公司，在商言商佢哋有權咁賣個產品，但咁做聰唔聰明呢？
你覺得唔聰明？
俾我去做 marketing就唔會咁喇，對陳豪又唔好，對成套戲都唔好，都冇將個產品最好嗰面騷出嚟！《點對點》最好嗰面係香港歷史同典故吖嘛，香港開埠一百七十幾年，共產黨先得六十幾年咋嘛！我哋有好多好嘢唔受尊重，香港島你行山會見到六條碑石，由灣仔伸展到去上環，啲碑石寫住一九零幾……妖，隔籬擺個垃圾桶喺度喎，好低 B囉我覺得，人哋年年去巴黎去 New York，就係睇歷史，人哋保留得好吖嘛！巴黎方圓幾百里都係舊樓……點解有鼠患啫，就係棟棟樓都百幾二百年，梗係有鼠患
咁焦點擺咗陳豪度有咩唔好？
佢做戲冇問題，但成個 product推出去，冇表現到最強嗰一面。《點對點》最好嗰一面係呢一班人，呢一個城市嘅故事，係傳統嗰樣嘢。對電影唔好，對演員都唔好，成條橋扭過頭囉……有小小可惜。呢套戲擺到明就係好，你睇下香港電影金像獎咁「圍威喂」都揀佢就知啦。
好直接喎你講嘢都？
點解唔直接啫？唔通帶你遊花園咩？當然我都有篩選過啦，我都做咗幾十年人，唔通亂噴咩！好過你過後：妖……邵仲衡……妖。
但係你連劉青雲、黎耀祥嘅演技都夠膽彈，真係好夠膽講。
對你嚟講，佢可能係影帝巨星 whatever，但對我嚟講佢係同期，黎耀祥試過馬來西亞拍戲住埋幾個月添啦，我覺得唔妥咪唔采囉。我覺得「柴九」唔啱黎耀祥咪唔啱囉，你唔覺得「柴九」應該係要粗線條啲咩？應該係黃德斌嗰啲做嘅咩？我係觀眾嚟㗎嘛，有權講㗎！比如阿「某君」，人哋問到我咪照講囉，人哋老婆嚟㗎，的而且確，冇拍拖就係冇拍拖，照直講啫。
蓋鳴輝浸大戲味 un頂 able
呢個美麗的誤會傳媒都炒咗好耐。
喂呀，我同佢拍套劇，講嘢唔超過十句。要避嫌，你知阿某君個人……個性格吖嘛。同某君開工開頭有講有笑，忽然間鞋口鞋面、衰衰格格，同女朋友講，原來佢一直追緊我女朋友。唔係追唔追人哋女朋友，係一樣還一樣，唔好喺工作度吖嘛……跟住都冇合作喇，我都出咗嚟（離開大台）。
你想當年都係咁㗎？
想當年都係咁，不過冇機會講嘢咋嘛……因為一早𡁻咗我啦。我仲記得當年叫我去維園做活動，一畢業就走出嚟，冇人教過我點對記者，一完十幾廿個圍埋嚟：「你係唔係同亞邊個邊個分咗手？」吓？大佬，𡃁仔分咗手已經唔 happy，仲要同你講？你估我點？笑死你，廿零歲仔，我轉頭走咗去……跟住就冇記者鍾意我。我嗰陣時點知人哋要交功課啫？一出嚟就擔正，日日 06至 27，邊顧得同記者打交道，跟住咪瀨嘢囉，咪俾人話我唔合作囉……
咁有冇得罪高層？
點會啫？我識林馮美基㗎嘛，即係煮咩都要落雞汁嗰個，佢跟住係招仲文、肥 Ben、跟住先至到樂小姐吖嘛，好似話𠵱家都唔係樂小姐啦，余詠珊吖嘛。
𠵱家有冇睇無綫？
《大時代》囉……其他噏唔出，冇乜興趣。前排有睇阿 Mo（陳豪），嘩！五分鐘已經頂唔順……好得人驚，啲人係話，做大戲嗰啲人（蓋鳴輝）有浸味㗎…… un頂 able。
點解離開咁多年，啲戲癮𠵱家先至起？
其實我開頭放低啲生意，係想返香港抖下㗎。你知大陸，吸埋嗰啲氣，飲埋嗰啲水，好傷㗎嘛。跟住港台搵我，我幫下手，咁就有人留意喇。
喺內地做生意咁多年，點解冇人搵你？
我都唔喺香港，我上車版全版 full page，形象太過「車」喇，我𠵱家仍然好多車，但人哋搵我，我都唔影車。我想分開啲，以前錯過，我唔想再錯喇。
以前你覺得你錯過啲乜？
形象問題，我冇理由做 TVB嘅時候做設計做裝修嘅訪問……要變喇，唔同以前做仔，要集中精神。到今時今日仲有咁多人記得我，我好感恩。都要有咁上下嘅 quality，先有人記得㗎。
十年前已經唔使做
冇走嘅話，你覺得你嘅演藝事業會行到去邊？
點會唔出嚟？一定要走，出邊多機會，喺入面爆一倍騷都係有限錢，我都要為自己打算，但佢（大台）就覺得我唔乖囉。你冇計，佢就覺得你冇價值，有計，佢又話你唔乖……你把口細佢把口大，佢係老闆，你唔夠佢講咪自己做老闆囉。嗱，唔係批評，呢個行業好多嘢好原始。
點解咁講？
大哥主義啦，全部聽晒你講……紅起上嚟自我膨脹、目中無人，跟住得罪晒人，燥狂症，又冇嘢撈。
呢行邊個燥狂？
你話呢？好多好多呢啲嘢都係俾人奉承出嚟，荷里活都一樣。我覺得我好彩，一路有接觸出邊嘅真實世界，可以比較、可以平衡，呢個係好處，但係唔好處就係唔夠投入。我對呢行唔投入，製作人睇到，觀眾都睇到。𠵱家就好喇，生活嘅擔子冇咁重……
聽講你已經唔使做？
我唔使做好耐喇！其實我三十零四十歲時，搵落嘅已經夠食。你做一份工咋，我由廿歲入電視台已經做兩份喇！以前室內設計，之後係車，但我始終好鍾意呢行，雖然呢行好多古靈精怪嘢，好似拍咗收唔到錢、或者開頭傾嘅嘢同入場拍係兩回事（ 94年三級片《不扣鈕的女孩》）。電影圈圍威喂，鍾意用自己班底關照自己人，我又冇做呢啲……有自己生意，老實講，如果我全身投入，𠵱家可能又唔同光景呢？
條路自己行出嚟，這些年見到人哋攞獎走紅，有冇後悔？
自己嘅人生，我都係順住條路行啫。我唔係嗰啲人，同樣角色同樣機會，都要撞啱其他環節先至得，求其一樣出事已經甩轆，邊有得預？呢行都係講技巧，呢句說話我始終記得，智叔嘅太太陳敏兒同我講，呢個行業充滿危機，你得就始終會得，但係盛放得快就凋謝得快，呢個係大自然定律。
係咩？得就始終會得？好多等咗一世都冇機會。
我始終覺得，俾人埋沒一世嗰啲人係自己攞番嚟。
都博士
除咗介紹佢入行嘅邱淑貞，同拍過十年拖嘅劉美娟，邵仲衡話電視台年代仲拍過五、六次拖，暗示個個都靚，個個都出名：「唔講邊個喇，一班後生一齊做嘢，拍幾個月拖有幾閒？」
點解你啲舊愛個個都嫁得咁好？（其實都係講緊邱淑貞）
「你唔好話我識揀？冇嘅，好女仔梗係際遇好㗎」
11年前，邵仲衡同圈外女友 Wendy結婚（不過大仔已經 14歲），十幾年前已經賺夠、兩個兒子一早送咗去英國讀書，唔只前度，其實邵仲衡嘅現任一樣幸福。
「做咩都要講 interest，同佢開始因為 interest，十幾年個 interest仲喺度㗎！我同邊個一齊過佢乜都知，不過佢唔睇我做戲，淨係睇埋啲韓劇、睇都博士，嗰啲我頂唔順囉。」
大佬孝，係「都教授」，唔係「都博士」呀喂。
|
鍾意就快D Share啦！
|
|
|
