&
鍾鎮濤同范姜上年8月去咗峇里島舉行婚禮，過百圈中好友都有出席，但就鬧出唔少風波囉。
有人爆佢要賓客掏荷包俾機票同住宿，仲要指定入住6星級酒店，每個人圍到2萬蚊港紙一個，仲要未計人情喎，搞到有賓客嫌揦脷。尤其賓客大多為名人巨星，人情比一般豐厚，喺少支出多收入嘅情況下，阿B自然被人指借婚禮賺錢。
就算今次喺香港補擺喜酒，同樣被指吸水，當事人更一早反駁：「如果真有得賺，我每個月都擺一次好了」。事實上賓客「你精我都唔笨」，上年缺席峇里島婚宴嘅劉嘉玲、梁朝偉就表示：「一年前已經送咗」；老友譚詠麟亦話：「冇帶啲乜喎，呢啲都係俾一次。」睇嚟阿B嘅如意算盤唔太打得響囉。
