一)《武則天》成大半套劇都講緊武則天同李世民嘅愛情故事，成套劇講到李世民有幾愛武則天，武則天又幾愛李世民。而史實上，武則天根本唔得李世民歡心，入宮十二年都只係做一個才人，而武則天就偷偷勾搭上太子李治。
二)史實上李世民唔愛武則天，愛嘅反而係劇中另一個奸角。劇中因愛成恨由忠變奸嘅徐慧，應該係歷史上賢良淑德嘅徐惠。
徐惠係天生才女，四歲識《論語》、《詩經》，八歲識寫文章，仲成日勸諫李世民。李世民不但唔嬲佢，仲對佢大加獎賞添。徐惠深得李世民竉愛，一路由才人升級上去，最後李世民死咗，仲哀傷成疾死埋，先真正係可歌可泣。
三)《武則天》成套劇嘅後宮佳麗都係V面，全部都瘦到得副骨，個個塊臉白得似鬼。史實上，唐朝人鍾意有肉地嘅豐滿女人，而且女人最好「面如滿月」塊面圓啲，同埋唐朝人鍾意紅臉，胭脂塗得好厚，誇張到王建係《宮詞》寫一個宮女「金盆水裏潑紅泥」，講佢梳洗之後，臉盆就好似多咗層紅色泥漿。
四)武則天畀人屈，出口就話：「莫須有的罪名」，莫須有應該係宋朝岳飛之後先出現架嘛？！
五)劇中韋貴妃囂張專橫，多次陷害妃子皇嗣，最後不得善終。其實韋貴妃為人謙卑，深得李世民喜愛，李世民死咗都未到佢死，李世民死後跟兒子李慎遷往封地，享年六十九歲，獲得善終。
六)劇中李牧係武則天初戀情人，史實上無李牧呢個人。
七)其實最離譜嘅出入，應該係套劇講武則天懷有李世民個仔再被李治召回宮養胎，因為同史實出入實在太大，武則天根本無可能懷有李世民個胎，被有關當局要求改返劇情，劇組唯有用剪接同配音硬改。
所以大家之後追劇個時，睇到武則天大肚個時，就會覺得好奇怪，完全唔明點解武則天會有咗李治個仔囉。
|
鍾意就快D Share啦！
|
|
|
