邵仲衡「孝蟹」上身嚇窒李麗珍
神劇《大時代》近期重播Hit爆，日前方家三姊妹慘被滅門，先後墮樓身亡，令觀眾再傷心多次！現實中的「方家三姊妹」李麗珍、吳詠紅和楊羚昨日則與大仇人「丁孝蟹」邵仲衡在活動上重聚！期間邵仲衡「孝蟹」上身瘋狂搶鏡，嚇窒珍妹，重演談情戲時又加戲攬腰，再追問珍妹婚期，令珍妹勁無奈！
神劇《大時代》正在半夜熱播，方家及丁家的對壘愈見緊湊，日前播到「方敏」楊羚跳樓自殺，「丁孝蟹」邵仲衡再派人推「方婷」李麗珍及「方芳」吳詠紅落樓慘死，劇情再成城中熱話！雖然相隔23年，但大批觀眾看重播都咬牙切齒及大感心痛！
四人玩集體回憶
劇中已死的方家三姊妹，昨日「回魂」出席商場活動，更與「仇人」丁孝蟹狹路相逢！大會安排四人玩「集體回憶」，與觀眾玩估舊歌遊戲及重演《大》劇劇情，可惜沒有最令人期待的向丁孝蟹報仇環節。現實中三姊妹均已為人母，49歲的珍妹容光煥發依然索，48歲吳詠紅剪了短髮晒熟女氣質，49歲楊羚繼續童顏，玩遊戲時超投入盡顯童心，並帶同囡囡上台合照。而近期曝光率甚高的51歲邵仲衡可算全場最受歡迎，他滿場飛與台下fans合照，更「孝蟹」上身不停出招搶鏡！
《大》劇中演情侶的邵仲衡與珍妹被安排重演擔遮談情戲，多年冇見的兩人難免表現生硬，珍妹更完全不投入，主持叫他們深情對望，邵仲衡望一望珍妹即誇張大叫被電親，到合照時他輕攬珍妹腰部，但珍妹就顯得不太受落。
代催潘源良求婚
受訪時，邵仲衡與珍妹互笠高帽表示大家都「冇咩點變」，邵仲衡大讚珍妹駐顏有術，猶如放了入雪櫃「凍齡」一般。提到珍妹男友潘源良即將開騷，有傳更會即場求婚，邵仲衡即表示贊成，並搶着說：「如果佢（潘源良）唔求婚我就搵佢喇！都應該」珍妹則表示不清楚：「唔好整蠱我喎！係就早啲單聲。（佢話有特別任務！）唱歌吖嘛！唔係唱畀我聽，係唱畀大家聽！」邵仲衡再搞笑追問珍妹「婚事」，珍妹即回敬一句：「自己買飛睇」並轉移話題叫大家再講《大》劇。問兩人會否想再合作？邵仲衡說：「佢（珍妹）肯我就咩都制！」珍妹說：「隨緣可能演姊弟。」但珍妹表示去年拍攝《女人俱樂部》大感辛苦，要時間休息，問到有否跟18歲的女兒提起舊劇再度Hit爆？她說：「佢唔喺香港喎！都有講過吓嘅，但套劇仲大過佢」對於有報道指女兒跟同性影親密相令性向成疑，珍妹淡淡說：「女仔同女仔影相好正常啫！」
問到當年拍《大》劇最難忘情節，珍妹及吳詠紅不約而同表示是大前晚播出的墮樓戲，珍妹說：「當年係第一次吊威吔！好驚！」吳詠紅亦說：「有七至十樓咁高，等咗三日先拍！我哋都好緊張，可惜最後cut走咗冇得足本播。」
文：影視組
|
鍾意就快D Share啦！
|
|
|
