35歲胡杏兒，在無綫效力16年，今年七月將約滿，本報收到消息，指杏兒決定與無綫說再見，簽約蕭定一旗下公司三年，包薪2,500萬。
7月中將約滿無綫嘅胡杏兒，已鐵定唔續約，希望將重心發展轉去影壇同內地拍劇。99年杏兒參選港姐，奪得季軍後加入無綫，未幾即晉身花旦之列，仲拎埋視后。但自從殼王陳國強於四年前入主後，便被公司投閒置散，不過杏兒卻因禍得福，可以經常到內地拍劇同演出綜藝節目。
今年初播出嘅南衞視綜藝節目《奇妙的朋友》，令杏兒喺內地人氣急升，商場演出同廣告亦隨之而來；北京嘅華誼、海潤同李澤楷旗下嘅大國豐臣等娛樂公司都邀請杏兒加盟。
經過一年時間考慮，據悉杏兒已選定與蕭定一嘅一元製作室簽約，因蕭定一開之條件比其他公司吸引，待7月中杏兒約滿後，就會動筆簽約三年，獲得包薪2,500萬港元。簽約後，杏兒更一次過獲得1,250萬嘅預支包薪費；蕭定一仲答應會為杏兒度身訂造開戲，更會在內地安排她接拍有質素的電視劇。
《蘋果》記者向杏兒求證，佢就避忌地謂：「吓，我仲未約滿喎！現階段唔回應」至於蕭定一就表示：「現階段我冇嘢可以回應。」問到是否以2,500萬包簽三年？佢都係話：「對唔住！依家我冇嘢可以回應。」
據悉杏兒現身在內地與袁詠儀合作演出劇集《領養》，以四十集計算，每集酬勞25萬人民幣，拍一套內地劇已吸金1,000萬元，預計拍到七月中。之後杏兒又答應為張國立監製的綜藝節目擔任嘉賓，十三集酬勞約600萬人民幣，看來她約滿無綫不愁搵錢，而且肯定賺得比以前多，面對內地如此大的市場，也難怪出手太低的無綫未能挽留藝人。
|
鍾意就快D Share啦！
|
|
|