【狂冧TVB】「新婚」何傲兒復工：大台食水唔深
2015-06-06 17:38:00
(攝影：沈建程)
今日係新婚——係「被新婚」嘅何傲兒BB，正式復工，喺會展行婚紗騷，共換咗8套婚紗。傲兒BB自言對酬勞非常滿意，笑晒話:「呢個係我轉新公司後第一個job，酬勞幾多係秘密，總之我好滿意。」傲兒BB話其實同前公司差唔多，但前公司無綫抽佣都唔少喎！傲兒就好小心咁話：「抽佣係非常正常，因為公司有投放資源做嘢，同埋食水唔深。」
之前傲兒BB宣佈離開大台嗰陣，喺微博貼咗封疑似有骨落地嘅信，難免令人聯想多多，如不獲重用、家姐何傲芝不被續約等等。上次傲兒BB加盟林建名嘅大名娛樂，無綫只係派TVB8來採訪，樂易玲等高層更是一個都唔見。
雖然傲兒BB口口聲聲同大台關係好好，不過就……今日佢每逢講到大台嗰陣，都非常小心，落足鞋油。好似話講到有傳歐陽震華不獲續約，傲兒BB話:「我都有留意，好愕然，我都好鍾意佢，覺得好可惜。」至於點解唔同佢續約，傲兒BB小心地謂:「我走嗰時都有留我，一年前已經傾，可能每case都唔同，因為我自己當時係想出去闖。」
有傳係傲兒BB係因為大台唔同家姐傲芝續約而出走，傲兒BB今日正式謂:「我好想澄清一件事，大台係開咗0一個非常非常非常好嘅條件，我自己都聽到流口水，而唔係大台唔要家姐，家姐當時係想出去闖。」
做人留一線，傲兒BB呢條線，成條海岸線咁長……
傲兒BB每逢講到大台嗰陣，都非常小心。
傲兒BB今日正式澄清，指大台開咗個好好嘅條件畀家姐何傲芝。
|
鍾意就快D Share啦！
|
|
|
