Cap圖龍虎榜 [忽然1周 - 1038] MW,

靚抽王

Cap圖龍虎榜

平日一打開 facebook同 WhatsApp，可謂 cap圖滿天飛， cap圖已經成為我哋生活嘅一部分。今期至新至 hit嘅 cap圖係乜？睇 Cap圖龍虎榜！

極危險，熱到思覺也失調

呢兩幅疑似係喺內地傳出嘅圖，除咗表示近日天氣熱到足以令人黐線之外，亦證明咗衫呢樣嘢，就算着得幾危險都好，只要你個樣夠安全，就一樣可以搓番勻吹你唔脹。大家請睇某網民對呢幅圖作出極度老實嘅神回應：「佢着得好危險，好彩佢個樣生得安全。」大熱天時，幸好有個笑話供人倒抽一口涼氣。

一場波掀起抽水熱潮

好衰唔衰，香港隊喺世界盃外圍賽同中國喺同一組，你知啦，近年我哋兩個地方之間嘅矛盾太多，又屎又基本法又政改咁……呢堆嘢都未搞掂，仲話要踢波！國足嗰邊首先出招，出咗張疑似有種族歧視嘅海報，不過港足亦都唔嘢小，即刻以另一張海報還擊，聲言要為香港爭口氣。對中國場波未打，第一回合香港先以 7比 0大勝不丹，大台播體育新聞時竟以本地角度怒抽水，一反維穩作風。果然，波係圓嘅，足球真係可以改變人心。

港鐵快運

冇嘢係唔會喺港鐵出現嘅，近日流傳出一幅圖片，堪稱快運廣告中嘅 XO。話說呢幅圖入面有一位大媽運載一個巨型洗衣機喺港鐵車廂入面招搖過市，展示其「使命必達」嘅驚人魄力。再加上側邊一位有笑容有 heart嘅真心小童擺出勝利姿勢，似係要為媽咪吶喊助威，不過就有網民質疑洗衣機入面全部都係 iPhone。我娛文樂個人認為就算入面真係有 iPhone，咁又點喎！佢能夠帶住個洗衣機入到閘，已經係 mission impossible，連湯告魯斯都做唔到

鍾意就快D Share啦！

下一篇 》