江華因腰患多年，放下演藝工作，休養近十年，最近更轉行保險事業。《蘋果日報》圖片
娛樂喧
黑超 Chok樣上保險堂 江華俾女集郵扯火
江華六年前因腰患及抑鬱症幾乎全面停工，近日轉投保險行業，而且密密上堂，積極準備新工作。久休復出的江華，上堂時深受女同學歡迎，紛紛要求合照，足見即使現年 52歲，魅力依然不減。
不過，可能因為愈來愈多女圍，其間江華突然情緒波動，嬲爆爆拒絕合照，更寸爆話︰「我依家係嚟上堂，唔係嚟影合照。」嚇得女同學鳥獸散。睇嚟重投社會的江華，度火依然在。
江華近日積極備戰準備投身保險業，上星期三（ 17日）更戴住草帽太陽眼鏡， chok住去尖沙嘴的辦公室上堂，比劉華更劉華。
據一位有份上堂的學生爆料︰「呢堂係講公司產品，佢（江華）上堂時好專心，中間休息時，好多女同學要求同佢合照，起初佢都來者不拒。不過，到第二次休息時間，可能因為愈來愈多人圍住，佢突然情緒波動，發火話：『我依家嚟上堂，唔係嚟影相。』雖然合照被拒，但現場唔少人都讚佢靚仔同 keep得好，佢仲同身旁嘅女同學好好傾。之後江華提早十分鐘落堂離開，可能驚落堂時又俾人追住合照啩！」
在外星味不減，但返到屋企，江華則做回住家男人。周日（ 21日）父親節，江華揸車載麥潔文及女兒回太太的音樂學校，他更在樓下等足兩小時，其間不時拉低眼鏡看手機，似乎是有點老花。之後他們一家三口駕車往尖沙嘴酒店嘆完下午茶，才返回沙頭角寓所。
麥潔文：佢對我超細心
本刊連日來在江華寓所外等候，都未見其外出，反而周二（ 23日），麥潔文出席活動並接受本刊訪問，她直指老公已取得保險牌照。對於老公上堂時被「集郵」而扯火，她則說：「佢咁做好應該，有啲人真係嚟上堂。（佢上堂時好專心喎。）咁咪好囉，咁就乖。佢都有同我講，阿 Sir都有出聲。（保險界好多靚女，擔心嗎？）要驚都係以前驚多啲喇，以前娛樂圈咁多靚女，依家佢個心向我。佢係一個經一事長一智嘅人，經歷咗咁多嘢，知道乜嘢應該做，乜嘢唔應該做，依家好放心。而且佢對我好細心，係超細心。（佢 keep得好 fit喎。）之前佢見我減肥，佢又減。我減肥時，佢日日都提我，對自己無益嘅嘢唔好食。」
百萬保險王
保險員每年保單銷售總額超過一百萬美金，便可以加入國際性組織「百萬圓桌會（ MDRT）」，能夠得到這個榮譽的藝人也不少。
鮑翠薇
眾多藝人之中，以鮑翠薇最厲害。她 1990年加入保險界後，翌年起連續 21年達成 MDRT指標，在保險界屬頂級人馬，唔只是藝人之冠，仲贏晒唔少比她早入行的保險前輩。
戴志偉
1999年開始投身保險業，戴志偉一邊拍劇一邊推銷保險，試過九次達成 MDRT指標，在保險界甚有名氣。
鄧一君
入行七年的香蕉仔鄧一君成績不錯，曾經連續三年達成 MDRT指標，難怪近日他不但荷包腫脹，連身形都日益膨脹。
上山詩鈉
91年已經加入保險界的上山詩鈉，據稱她簽一張保單就可以過二百萬美金，簽單能力非同小可。
|
鍾意就快D Share啦！
|
|
|
