傳足三年緋聞，小方、 Stephy直至 06年合拍《獨家試愛》才認撻着，至今九年，生活一早形同小夫妻。
真面目
大迷信 1年前求定婚 高人擇日 方力申下年 9月娶 Stephy
拍拖九年、年年傳婚訊，方力申同鄧麗欣呢一對到底有幾鍾意長跑？
好囉好囉，終於等到小方口中「 35歲就結婚」嘅限期，今年二月年滿 35歲嘅方力申果然有行動，年初錄影大台《蜜月到訪》當眾求完婚，嗱嗱聲搵師傅擇定好日，鐵定明年九月拉埋！不過《 FACE》問到當事人，又是例牌話「大家冇限期」，其實仲等咩呢？下年 Stephy都 33啦，難到要等埋發叔？
九件餅女嫁得嘅嫁咗、生得嘅亦都生埋，除咗不停換畫嘅 Angela區文詩，同早前傳出婚訊嘅傅穎，都不及 Stephy年年傳一次、年年都證實係虛報。其實愛巢搵定、一早住埋、已經夫妻檔一樣孖住搵食幾年，仲等？
夾八字香港行禮
03年開始緋聞滿天飛、 06年戀情浮上面，人人都認定方力申娶硬 Stephy，係爭個日子啫！五年前小方公布限期，話要 35歲結婚，大丈夫果然有口齒，原來二月滿 35歲，已經趁住為大台錄影《蜜月到訪》的大好時機求咗婚！據悉小夫妻風水信到足，求婚成功後便托高人夾定八字揀定好日，亦都聽哂高人話，鐵定明年九月在本港行禮，不過生仔仲未係時候喎。
週日（ 28日），賺完人仔嘅小方回港出席慈善活動，又懶神秘唔肯認：「佢梗係結婚理想對象啦，唔係都唔會拍咁耐拖！但冇吖！未求婚未擇日！有打算（求婚）都唔話俾你哋知，做咗你哋就知我自己都唔心急，點解大家咁心急呢？乜你哋做定好大份人情咩？」乜你想收大份人情咩？你唔認又叫人點送呢？
唔結就要等多四年！
堪輿學家楊皓雲睇過小方、 Stephy八字，都話兩人明年立秋後要拉埋：「佢哋兩個都未行運，所以就算感情穩定都未結得婚住。不過小方出年行正財運、個名亦有紅鷥星出現，最好時機就係下半年立秋後、即係陽曆八、九月要結。唔係就要再等四年，或者會分手添！」
嫁淨蔗
02年成軍， Cookies九大餅女嫁一個少一個，餅碎 Serena同 Elaine仲生埋添，計埋年頭嫁咗嘅 Kary、同求婚成功嘅 Stephy同 Miki，家陣活躍圈中又仲未有着落嘅真係所剩無幾。
|
鍾意就快D Share啦！
|
|
|
