朱慧敏撲院探Eddie感情翻叮
原定明年初結婚的朱慧敏（Queenie）和彭懷安（Eddie），因男方夜會索女令婚事煞停，之後兩人關係膠着，前晚Eddie意外斷手入院，竟成功挽回Queenie芳心，她兩度撲到醫院探望，還將本已降呢為「生意夥伴」的Eddie升呢為「知己」，感情有轉機，令Eddie大為窩心，這對患難見真情的愛侶有望愛火重燃，Eddie可謂傷得有價值！
朱慧敏疑因男友Eddie拖索女夜蒲，令二人感情亮紅燈並將婚期擱置，Eddie的未婚夫地位被Queenie降為「生意夥伴」，關係告急，他只好乖乖「守行為」靜待伊人回心轉意，至日前他在開設的餐廳工場監控月餅製作時，意外摔倒拳頭落地令右手手部骨折，要入院進行接駁手術和矯形，膠着的感情關係竟因此有轉機。
代否認「自殺」
昨晨約八時半，戴上口罩的Queenie打的往醫院探望Eddie，並逗留了約一小時才獨個兒離開，她說：「最初只知佢要全身麻醉做手術，唔知咩咁大件事，所以嚟探佢。（依家更珍惜佢？）大家感情一向好好，在公係生意拍檔，在私係朋友、知己。（傳你哋已經正式分手？）大家都係好朋友、知己。（復合？）感情嘅事好難講。」
談到有傳她因擔心將遺傳病傳給下一代而不生育，成為分手原因？Queenie說：「報道莫名其妙，大家都好喜歡小朋友，有共識。真係唔知生完小朋友會令患癌指數提高喎，要問吓醫生先！（你原諒咗Eddie？）當日佢同女友人去蒲被拍下，我只係覺得忟，我相信佢冇對我不忠或出軌，用『偷食』字眼對佢好唔公平。的而且確結婚係唔會結住，希望大家用時間去處理感情事。」Queenie又代Eddie否認是為情自殺入院，並說：「咁大個人，傻(口架)咩！」
慰問感「窩心」
約一小時後，Eddie在助手陪同下出院，並表示Queenie連續兩天都有探望，問他是否感到窩心？Eddie說：「當然窩心。（順便挽救感情？）大家一直溝通得好好，唔可話挽救，係慰問。」至於要Queenie頻撲出入醫院探望會否感到內疚？他說：「唔會嘅，佢應該都唔會咁諗，佢有事我都會一樣咁做。（有信心維繫感情？）感情係要有信心嘅。」
至於可否用拍拖來形容二人目前的關係？Eddie猶豫了一會說：「用知己啦。（情侶關係？）情侶呀？哈……用番知己、朋友、拍檔咁樣囉！依家有良好溝通，但婚事要感情再好啲先。」
文：影視組
|
鍾意就快D Share啦！
|
|
|