詩詩最強驚喜子丹生日唔lonely
「宇宙最強」甄子丹昨日52歲牛一，原定隻身飛英國拍戲的他，日前於機場出發前獲太太汪詩詩送上大驚喜，帶同一對寶貝仔女突然現身，更齊齊赴英，令子丹感動不已，更忍不住向詩詩送吻！詩詩透露為此精心計劃了兩星期，期間有幾次更差點穿煲，幸最終有驚無險，被蒙在鼓裏的子丹則大讚全家均是好戲之人，於毫無破綻下完成計劃，而向來恩愛的子丹與詩詩，更由屋企門前到機場咀不停，羨煞旁人。
貴為「宇宙最強」的甄子丹身手了得，不過鐵漢對着太太汪詩詩及一對寶貝仔女亦有溫情一面！眾所周知子丹對他們錫到燶，一有假期便與他們四圍飛享受天倫之樂，惟片約不斷的他，近年生日幾乎也於工作中度過，今年也不例外，剛與家人從美國返港的他，日前便隻身飛英國為新戲開工，預料生日當天也要開工，雖然子丹曾邀請詩詩同行，惟詩詩以忙爆為由推掉，令子丹一度失望，但實情詩詩秘密為老公準備好驚喜，並準備於機場「送禮」，作為預祝子丹52歲的生日禮物。
感動到爆 咀嘴致謝
日前子丹如常乘保母車出發機場，上車前更兩度與詩詩kiss，表現得難捨難離，並表示兩星期後再見，沒料子丹於機場航空公司櫃枱寄行李之際，詩詩帶同仔女突襲現身，並向正在整理行李的子丹大叫：「Surpise！」，女兒更拿住蛋糕與子丹預祝生日，頓時令子丹反應不過來，只不斷表示：「真係好suprise，點解嘅！」
詩詩見計劃成功即與一對仔女擊掌，並一臉沾沾自喜模樣。及後子丹問仔女是否來送機，詩詩即笑謂：「我哋係同你一齊去英國，你生日嘛！開唔開心？」眼見太太如此悉心安排，子丹感動之餘，還與太太咀嘴表謝意，場面甜蜜又溫馨。
精心策劃 身心疲累
詩詩受訪時表示終可鬆一口氣，為了是次旅程可謂身心疲累，她謂：「準備咗10幾日，一路諗緊去唔去，啱啱先喺美國返嚟幾日，小朋友有時差都好攰，但最後都決定畀surpise老公，開頭都推老公，話公司好多嘢要跟，佢一路complain，其實佢咁多年拍戲生日都係自己過，今次又係咁，就會覺得佢好lonely。」更指事前僅得女兒、妹妹汪圓圓、母親及幾名公司同事知道，詩詩謂：「我仲要偷偷去公司做嘢，等佢出去我先可以pack自己同小朋友啲行李，之前見老公執行李，我心入面不知幾急，只係扮晒冇嘢，都試過有幾次差啲講錯嘢，真係好緊張，今朝一早拎晒我同仔女行李上另一架車先，頭先細佬仲以為去睇戲。」
至於子丹就讚賞家人如此保守秘密，更謂：「佢哋啲戲真係犀利，surpise，之前太太推咗我之後都冇諗，仲諗住今年又係自己一個人過，依家好開心，有family我就足夠，冇咩生日願望，好滿足。」
文：影視組
|
鍾意就快D Share啦！
|
|
|
