上週三，返港的祖藍同老婆李亞男到又一城撐枱腳，被問是否再買大屋，他直認：「有睇吓，係想買多間。」
探熱針
邵氏打本開檔 王祖藍三千萬再買樓
無綫小生花旦再掀起逃亡潮，有指已約滿的胡杏兒及明年夠期的佘詩曼，均考慮過檔邵氏電影發展；跟住走的還有近年做埋編劇、撈兩瓣的王祖藍，據悉祖藍轉投邵氏後，將自組山頭打骰，開經理人部門及搞埋製作。
內地狂賺人仔，邵氏又打本開檔，水浸祖藍決意搬離住唔夠一年，花二百萬裝修的爛尾屋，同老婆李亞男搬入三千萬豪宅，準備生 B。
俾珍姐㩒住
觀眾晚晚捱膠劇！王祖藍一三年獲當時仍在位戲劇組高層梁家樹力撐，另組編劇班底，炮製破格的《老表，你好嘢》，結果收視口碑雙贏，自此，被插撈過界的祖藍成為珍姐曾勵珍眼中釘。
梁家樹去年榮休，珍姐一統天下，被視為「梁派」的祖藍處處綁手綁腳，阻住發圍；但亦因而令他有機會北上發展，返內地做節目、拍劇掘金。
與戲劇組珍姐、綜藝科余詠珊長期暗鬥的藝人部樂易玲，近年已將戰線移去邵氏電影部，主要任務是拉攏將約滿的無綫小生花旦轉會，其中包括王祖藍。
帶埋老婆走
據悉，祖藍將會在邵氏開工作室，搞製作拍電影，甚至得高層放權，自組山頭開經理人部門。
「珍姐開劇唔用祖藍，所以上年佢只係專注幫余詠珊睇實的綜藝科做《 Sunday扮嘢王》，依家終於甩難，祖藍過到邵氏，會主力搞製作、度劇本。有人主張佢開埋經理人部門，因為之前搞咗兩次《老表》，都扑中有幾個演員出到位，大家信佢眼光，可以搵到有潛力但被忽略嘅演員。
「如果祖藍簽人嘅話，一定簽埋老婆，佢一直想同阿男夫妻檔做嘢，但佢會一步一步嚟，先做好製作。遲啲祖藍會喺邵氏有個辦公室，暫時就喺觀塘自己公司度住劇本先。」知情者說。
趙雪英陪睇樓
泊新碼頭大展拳腳，在內地一樣撈得掂！○二年已鋪路北上的祖藍，去年因為主持浙江衞視王牌節目《奔跑吧兄弟》而在內地走紅，節目身價由昔日幾萬蚊一集，上漲至百二萬人仔一集，水浸！
去年底，與家人及李亞男搬入以千三萬購入的大埔雅景花園，但住唔夠一年，已經心思思要換屋。有指祖藍數度拖埋老婆，與老友趙雪英四出在大埔區搵樓，目標盤統統是三千萬以上，其中包括天賦海灣複式單位和比華利山獨立屋。
「祖藍依家同屋企人住，阿媽、阿妹各自一間房，佢舅父亦成日會嚟，兩公婆得間主人房二人世界，加上開始計劃生 BB，如果有小朋友，而家間屋真係唔夠住。不過就算搬都喺番大埔區，方便返去同阿媽食飯。」身邊人說。
接老婆收工
上週三（八月五日），要定時定候返內地做節目的祖藍晨咁早九點半，已經返到觀塘的製作公司開會，一直到傍晚六點，祖藍先去九龍塘等老婆收工，再一齊去又一城食飯。
上前求證周圍睇樓搵屋搬，祖藍說：「周圍有睇吓！（雅景花園住咗冇耐喎！）睇吓有冇機會買多間。（係咪計劃生 BB？）隨緣唔係依家，但遲啲都要，最緊要搵啱地方先，香港啲樓好貴。」聽到生 B，在旁的李亞男即插嘴：「慢慢 plan」
樹倒人散
無綫戲劇組過去分別有兩派陣營，但自從與曾勵珍各據山頭的梁家樹去年離開無綫後，由他一手提拔的小生花旦，包括徐子珊、吳卓羲和黃宗澤都被投閒置散，紛紛萌去意。
吸北水買南樓
無綫出手低，藝人轉戰內地反而賺到笑，吸完北水回港買樓，其中以連掃三個物業的鄭嘉穎最豐收。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|