王祖藍狂賺人仔換磚頭，億二買樓送俾李亞男，冇手軟！
探熱針
先睹為快 有口齒 王祖藍送李亞男億二複式樓
今年初，王祖藍與李亞男拉埋天窗時，已開出期票，表示會努力儲錢，買多層樓送給老婆；新婚才半年，祖藍已達到目標，出手更非常闊綽。今個月中，王祖藍豪擲一億二千萬，購入大埔逸瓏灣頂樓連私人空中泳池複式單位，物業由李亞男個人持有，王祖藍錫老婆錫到燶。
半年進賬五千萬
矮仔多計！五呎三吋的王祖藍，亦有本事追掂華裔小姐冠軍李亞男，為鋪路娶女友過門，一三年他以一千三百多萬買入大埔雅景花園築愛巢，由於當時李亞男未正式做王太，物業由祖藍持有。
今年二月，「長短腳之戀」開花結果，愛妻號祖藍，答應老婆會努力賺錢，買多層樓送給她。
「亞男個人好純，唔追求物質，平日著衫都好樸素，最貴嘅珠寶，都係祖藍送嘅（三百萬鑽戒），就好似啲人唔明佢點解揀個矮自己咁多嘅一樣，佢根本唔在意外表嘅嘢，性格好統一！」知情者說。
近一年，大部分時間留在內地工作的王祖藍，收入可觀，過去半年，已賺過五千萬。
「祖藍喺內地鋪路已經有一段時間，佢有份嘅《奔跑吧，兄弟！》好受歡迎，係佢事業一個高峰，好多 job主動搵上門，多到做唔切，而家拍一集真人騷收百二萬人仔，雖然想多啲時間陪老婆，但有咁多搵錢機會，佢冇理由唔搵，唯有盡量就，有空檔就返香港！」王祖藍身邊人說。
六個經紀候駕
搵到錢，王祖藍婚後半年，已經可以兌現送樓給李亞男的承諾。
「兩公婆開始計劃生 BB，所以想買個大啲嘅單位，而家住緊嘅雅景花園就留俾媽咪同細妹住，不過祖藍一定要搵番大埔區，方便返去探媽咪！」
今個月中，在內地拍新劇《哪叱》休假返港的祖藍，孖住老婆約埋好友趙雪英出動睇樓。下午二時多，三人兩車到達大埔逸瓏灣，六名地產候駕，浩浩蕩蕩走入屋苑。
四千萬變億二
據地產界經紀指，王祖藍和李亞男其實早於三星期前，已去過逸瓏灣睇樓，當時兩公婆對其中一個面積二千呎，叫價四千萬的單位表示有興趣，再去睇多次，就落訂扑槌。
但當日地產經紀再推介屋苑另一個豪華複式單位，祖藍更一睇就鍾意，即時拍板，一億二千萬，照買！
「之前睇四千萬嗰個單位，亞男已經非常滿意，但祖藍鍾意個複式嗰個多啲，單位實用面積有二千八百呎，另加二千八百呎天台連私人空中泳池，一百八十度海景，億二其實都有啲貴，但最緊要係心頭好！」
寫老婆個名
豪買過億物業，單是首期已經六千萬，但據知單位並不是夫婦聯名，而是李亞男個人持有。
「祖藍覺得自己遇到亞男，係佢人生最幸福嘅事，錢財身外物，佢諗都唔諗，就決定將呢間屋送俾老婆，講得出，做得到！」王祖藍身邊人說。
月供三十多萬
在內地搵真銀的王祖藍， 13年斥資一千三百萬購入雅景花園獨立屋，早前再郁手，購入一億二千萬逸瓏灣氹老婆，首期五成六千萬，餘款依照現時按揭利率 2.15%，若分二十年還款期，每月須供約三十多萬，另外印花稅及律師費亦超過五百萬，好重磅。
仲有陳奕迅
娛樂圈有不少「愛妻號」，但未必個個都大方到投資磚頭一定預埋老婆一份，財政獨立，你還你，我還我，錢銀唔撈亂多的是，好似王祖藍咁愛嘅，仲有陳奕迅。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
