神隱廿年，歐陽佩珊轉行考中醫牌，開設醫館教氣功針灸，專醫奇難雜症。
探熱針
救賈思樂教林漪娸 歐陽佩珊神隱 22年練氣功
在無綫經典劇集《神鵰俠侶》飾演黃蓉一角而深入民心的前大台花旦歐陽佩珊（郭峰老婆），九三年宣布息影後，到北京學中醫並鑽研氣功針灸，成功考到執業氣功中醫師牌，返港在九龍灣設館開業，幾年間已收徒過千。
神隱二十二年，已經六十一歲的歐陽佩珊，名下的氣功醫館「 Susanna House」至今，不乏圈中熟客，其中包括患有糖尿病的賈思樂和《愛•回家》的林漪娸都是門下學生。
收生嚴格
一二年離開無綫轉投港視的郭峰剛剛約滿，回復自由身；六十三歲享受半退休生活，間中返老婆歐陽佩珊位於九龍灣的氣功醫館幫手，悠悠閒閒。
「呢一行有好多人都搵過 Susanna（歐陽佩珊）幫手，好似賈思樂之前糖尿超標，跟佢學咗氣功一年，指數就回復正常，另外林漪娸都係佢學生，因為佢媽咪嘅糖尿病都係 Susanna醫番好嘅。
「不過年紀開始大，日日上堂好吃力， Susanna想過退休唔教，但好多熟客都勸佢唔好退休，等大家可以有個地方聚埋一齊。」知情者說。
記者致電賈思樂，他亦直認跟 Susanna練功：「係林漪娸帶我哋去學，嗰時仲有廖安麗、連炎輝，我哋自己一班，學完之後的確係精神啲。」
多年來，歐陽佩珊門下教超過二千學生，其中還有不少是有長期病的圈中人，但她收徒條件非常嚴格。
「佢唔係個個都教！脾氣太暴躁嘅，或者佢哋認為唔適合學嘅就唔會收，好多人都係碌人情咭，熟人介紹𦧲佢收。」郭峰身邊人透露。
郭峰做司機
上週四（八月十三日）下午三點，歐陽佩珊與郭峰一同離開西貢村屋，先到村口丟垃圾，再揸車落坑口港鐵站，歐陽佩珊落車轉搭港鐵返九龍灣醫館。
六十有一的歐陽佩珊一頭短髮，身形雖比廿年前發福，但未算大走樣。於九龍灣站落車後，她在德福廣場行了幾間鋪頭睇特價衫，但冇收穫，之後坐低大家樂食下午茶餐，等到差不多夠鐘，才行返氣功醫館上堂。
煙癮起
至於郭峰揸車送完老婆去坑口後，便直駛到荃灣綠楊新邨，泊低車先到便利店交費和去銀行，跟住再去剪頭髮。搞掂啱啱夠鐘揸車去九龍灣接埋老婆，之後拍拖到將軍澳 Pop-Corn商場的 Pokka Cafe，撐枱腳。
食食吓，歐陽佩珊煙癮起，要走出商場外扯番支煙；吸煙危害健康，但有超過廿年氣功底護體，應該頂得住嘅！
老戲骨
現年 61歲的歐陽佩珊， 75年加入麗的電視成為花旦，三年後轉投無綫，拍過《網中人》、《抉擇》、《楚留香》等經典劇，在《神鵰俠侶》中飾演黃蓉一角更深入民心。其後有傳老公郭峰患上癌症，靠氣功逃過一劫， 93年歐陽佩珊退出娛樂圈轉返內地讀中醫，畢業後正式成為執業氣功針灸師，在香港開班授徒。丈夫郭峰亦是圈中著名老戲骨，拍過《尋秦記》、《創世紀》、《豪門》等電視劇，二人早在麗的年代合作《無語問蒼天》撻着， 77年拉埋天窗至今。
養生
都市人對健康養生愈來愈重視，其中氣功是可以鍛鍊自身行氣、運動意識及透過呼吸去調節身體，以達到強健身心、防病治病及養生的功效。氣功分調心、調息、調身三大元素，可以排除雜念，令血氣暢通，五臟六腑功能協調，從而增強活力，延長壽命，推遲衰老。練習氣功，多建議在室內，避免吹涼風，因運功時全身毛管會擴張，涼風容易滲入身體。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|