上年《天師鬥殭屍》首映，戲中伍允龍做男二，嘉欣 BB高調撐場，仲上台同男友合照，唔怪得大台諗到呢條緋聞救收視嘅屎橋啦。《蘋果日報》圖片
真面目
真人演出 出屎橋擺 3角戀上枱 大台夾鍾嘉欣戀伍允龍
連不死子珊都話離巢，大台拍套劇都分分鐘唔夠人，搵鬼睇咩？但膠劇 must go on，又被班充滿「創意」嘅極高層諗到橋，就係搵緋聞情侶拍劇。今次做白老鼠係鍾嘉欣，搵佢拍拖多年男友伍允龍入嚟，再拍傳過緋聞嘅陳展鵬，大玩三角戀，希望由開機到播映前都炒得起新聞，咁收視咪升囉。
雖然大台搵王晶出力游說伍允龍，不過一向將感情事低調嘅鍾嘉欣好似唔多想，到家下都未答應。喺囉！小心連嘉欣 BB都走埋呀！
31歲鍾嘉欣出名捱得聽話，當年拍劇拍到成面瘡都唔敢請病假就知啦，最近同黃宗澤忙拍《警犬巴打》，仲有兩個月先拍完，不過大台已諗定搵佢 8月尾踩多套《城寨英雄》，本來同一時間開兩套劇，嘉欣 BB都冇所謂，但佢最唔開心，就係大台要佢同拍拖 8年嘅男朋友伍允龍飾演情侶，再加埋傅過緋聞嘅陳展鵬炒宣傳。
王君馨隨時頂上
大台劇近年收視插水又帶動唔到煲劇潮，極高層當然要俾啲創意啦，就係諗到用緋聞炒作救收視，呢招老時常出現， 09年就用鄭嘉穎、佘詩曼呢對過氣情侶拍《宮心計》，當年由拍攝到播出都 keep住有人氣，諗住呢次舊招重用，可惜嘉欣 BB一聽個陣容就知公司想點。
一向將感情事低調，唔想被擺上枱，一向唔「托手踭」嘅嘉欣 BB第一次話諗下先；大台亦有兩手準備，萬一嘉欣 BB唔拍，就搵女二王君馨頂上。至於嘉欣男友伍允龍，原本喺電影做武指上緊位，但因為大台搵晶哥開口，恩師叫到冇得扭計。
外援多老將
當大台要搵到未拍過劇嘅伍允龍嚟幫手，就知大台小生荒幾嚴重啦，就算搵番嚟拍嘅都係 45過後嘅大叔，無論男一、甘草都冇人，唔緊要，因為一台獨大，求其畫面有人出現，廣告費一樣照收。
|
鍾意就快D Share啦！
|
|
|
