2015年8月5日 星期三

等埋位  now TV港娛開劇撼大台 夏雨菊姐 ready:梗係拍啦 [FACE - 428] 夏雨,now,MF,



nowTV免費台有意以《溏心風暴》原班人馬拍《黃金風暴》,夏雨、菊姐等都好想再合作。

真面目

等埋位  now TV港娛開劇撼大台 夏雨菊姐 ready:梗係拍啦

政府發免費電視牌照講就講咗好耐,幾時先唔使繼續一台獨大?終於李澤楷旗下嘅香港電視娛樂(港娛)獲分亞視半條頻譜,最快出年第一季有得開台喇!

過檔 nowTV拍過《衞子夫》嘅劉家豪同梅小青亦已積極籌備新劇撼大台,除咗有古裝《舉世無雙》外,更有意重組《溏心風暴》班底開拍《黃金風暴》,向夏雨、關菊英、米雪、李司棋和馬浚偉等招手。早已厭倦大台只重用余詠珊黨嘅夏雨、菊姐同馬浚偉都準備就緒話:「梗係拍」唔通等埋發叔咩!








大台余詠珊隻手遮天,小生花旦走完一個又一個,甘草亦留唔住,適逢 nowTV獲發免費電視牌,開劇定必向大台舊將招手;劉家豪、梅小青兩公婆既然主力為 nowTV拍重頭劇,揚言要將《溏心風暴》經典重現,明年將開拍《黃金風暴》,大鮑夏雨、大契李司棋、細契關菊英、林峯、馬浚偉同陳法拉等都有份。

重播《衞子夫》

但由於開台時間緊迫,「港娛」明年第一季開台未必趕得切播新劇,小青姐打算將兩年前舊作,由林峯、周麗淇等主演的《衞子夫》作為免費台頭炮劇,雖然該劇喺內地以及 nowTV嘅 100台收費電視頻道播過,但口碑唔錯,而且香港免費頻道屬首播,相信仍有捧場客,編劇梅小青回應話:「我當然希望咁做,因為古裝劇冇時域限制,唔似時裝劇擔心唔 update。呢部劇內地收視同口碑都好好,我都希望可以做到開台劇。」

至於說好的《黃金風暴》,雖然暫未落定開鏡日子,但一眾甘草已經磨拳擦掌,夏雨就表明好想再同小青姐合作:「上次同小青傾過電話,佢話要遲啲先,暫時未有行動,有機會再合作我梗係拍」關菊英:「暫時唔清楚,我𠵱家放緊假,可以拍就當然好」馬浚偉表示好樂意再合作:「之前食過飯有傾過,等緊佢哋再聯絡。」米雪則回應:「暫時未知,最近冇同小青姐聯絡過。」希望今次真係挑戰到大台

'07創新高

07年嘅《溏心風暴》最高收視高達 48點,如台前幕後再合作《黃金風暴》,相信幾值得期待。電視畫面

梅小青又有意搵陳法拉拍另一重頭古裝劇《舉世無雙》,但法拉經常周遊列國不在港,想搵佢拍劇真係早啲 mark定期好喎!

劉家豪(左一)同梅小青(右一)為 nowTV製作過林峯(右二)主演嘅《衞子夫》,亦極有機會成為港娛開台劇。《蘋果日報》圖片

搵美棋 BB扮《 Running Man》

「港娛」明年開台,據知李澤楷唔想花太多資源,拍劇要請太多演員同劇組人員、布景組人員等等花錢太多,故此「港娛」拍劇數量唔似大台咁多,反而多製作綜藝節目。內部人員透露,「港娛」參考韓國人氣節目《 Running Man》製作真人騷,有 8位成員,每集要挑戰一個高難度任務,其中已落實人選有美棋 BB。

黃美棋最近喺自己 YouTube頻道挑戰多項小玩意,如劈香蕉、吹麥提莎、 15秒食 15粒棉花糖等,因為獲「港娛」注意而搵佢拍真人騷,美棋 BB喺電話回應話:「暫時好初步傾啫,咩都唔講得住㗎!」

美棋 BB喺 4個月前開始《一日一 mission》,挑戰過用腳夾朱古力奶飲、用卡飛香蕉等,夠騎呢而被 nowTV睇中。 YouTube畫面

美棋 BB喺港視拍過 6套劇,好想喺 nowTV拍劇:「係好奇怪啦,點解唔搵我拍劇啫?我 ok㗎!」

港娛有意參考韓國爆紅《 Running Man》形式,製作另類真人騷。網上圖片

明年 3月有得免費睇

港視王維基已棄守電視業務力谷網購,惟有寄望李澤楷旗下嘅港娛同大台鬥過。早前 nowTV仍因頻譜問題跟通訊局傾條件,通訊局終於喺上月底公布明年 4月 2日起收起亞視 1條半數碼頻譜,會分配半條予港娛,市民就唔使用機頂盒,可直接喺電視收睇節目,港娛亦需要喺明年 3月 31日或之前提供一條 24小時粵語頻道,以及喺 2017年 3月 31日或以前提供一條 16小時英語頻道。即係話明年初就有得免費睇港娛節目喇!

可憐王維基啲劇就快播完,港視將轉型主力做網購。《蘋果日報》圖片

李澤楷旗下嘅港娛獲得免費牌照,將於明年初開台。《蘋果日報》圖片

鍾意就快D Share啦!
Related Posts Plugin for WordPress, Blogger...