袁苡晴(Katvia) 27歲 中文大學中文系碩士畢業及法律系博士 Yr.2
雖然 Katvia話自己唔鍾意笑，又自信到冇朋友，講嘢鬼死咁直率，但一到上堂，佢就會變成另一個人，同學生有講有笑：「有咩問題？咁上堂有我一套教學模式，同我份人點係冇衝突㗎！」
Main Camp
唔發明星夢 𡃁模變補習天后：好介意俾人當死蠢
逢書展大批𡃁模走出嚟谷胸賣寫真，撞樣撞到分唔清係邊個，最慘係𡃁模生涯唔持久，玩一兩年就人間蒸發。
現為中大法律系博士嘅袁苡晴（ Katvia）， 05年都做過𡃁模入行，但喺 09年最後一年中大生涯， Katvia決心止蝕，唔發明星夢，完成學士後繼續攻讀碩士、𠵱家仲修讀中大法律系博士學位兼成功轉型，做遵理中文科補習天后。
仲以為袁苡晴會學其他轉行𡃁模改名換姓，不過 Katvia絕對唔介意學生知道佢啲陳年往事：「有乜好驚？我導師廣告都有寫名自己參加過《 YES!》校花選舉同大台 09年嘅《 Cover Girl》啦，我好憎人哋覺得𡃁模就代表『大波冇腦』囉！我只係細細個想入娛樂圈，但唔代表我唔讀得書，反而我好介意俾人當死蠢！」
唔介意性感
Katvia對其 32C、 23、 33的美好身材好自豪，亦透露以前也不介意性感，不過就大嘆 7、 8年前自己嘅靚模時期，最多都只會拍攝較健康性感嘅雜誌平面硬照，𠵱家𡃁模就一味靠露肉寫真。
流住 M血考試
會考 26分，高考唔係 A就 B，入讀中大中文系，理應被標籤「人生贏家」，點知 Katvia仲話考呢個分數喺佢心目中係失手成績：「我本身會考目標係 29或 30分，我 A-level亦都諗住科科 A，其實對我嚟講，唔係 A嘅話就代表唔合格。好記得考地理嘅時候我月經嚟到血崩咁，啲血沿住櫈腳滴落地，我仲堅持考完卷一嘅時候返屋企換條褲再考卷二，結果當晚送咗去急症輸血。嗰陣個個都認為我入到中大中文已經好叻，但我想講，如果唔係因為身體失調，肯定一切都會唔同晒！」
遭狂徒摸胸
Katvia咁硬淨全因 9歲起已經要獨居，一腳踢照顧自己：「因為我 9歲喺大陸落嚟，但媽媽要到我 16歲時先申請到嚟香港，爸爸又拋棄咗我哋，所以嗰段時間起居飲食靠自己搞掂，試過有變態佬跟蹤同非禮摸胸，都係自己用「暴力」解決，大聲呼喝完打佢幾巴就算，我一定要撐住，因為我仲有媽媽要照顧！」
Katvia以 GPA 3.6畢業中大中文系，仲搵到薪高糧準嘅中大中文系做講師，可以令媽媽有好日子過，不過 Katvia寧願選擇跳出嚟做一個冇底薪全靠學生人頭收佣嘅補習導師：「因為大學講師除咗上堂，仲要做超多行政工作，好浪費時間，二嚟為錢，雖然𠵱家收入得以前一半都冇，但我深信自己能力，好快收入會翻十倍，係值得投資嘅！」
出 11本精讀
今年 Katvia喺書展都有「擺檔」，不過就唔係推出三點式寫真，佢仲 1年內推出咗 11本 DSE精讀，而當日 Katvia同場見到《明報》總編輯劉進圖新書簽名會，即上前變小 fans合照。
《求愛》哈佛阿佳都撈補習
Katvia有中大講師唔做，寧願搏一鋪加入補習天后大軍，而曾經參加過大台真人騷《求愛大作戰》的梁俊佳(Guy)，都喺屋邨(華富邨)長大，同樣讀書叻，考入哈佛大學兼在該校成為講師，不過今個暑假佢都變身成為通識科補習導師，齊齊教 DSE學生。
|
鍾意就快D Share啦！
|
|
|
