王宗堯：
Hair:Hei@Xenter
Make-up: Aster Pang
Styling:DKNY, Ted Baker
方健儀：
Hair Vincent Yeung@Rvsstyling
Make-up: Katherine Lo
Styling:Ziztar
U人攻略
講毒宣言
今時今日做藝人，淨係出騷跑通告唔夠嘅。要個個認得你，叫得出你個名，夠「毒」都好緊要！講緊嘅「毒」當然唔係對住部電話轉珠嗰種，而係要緊貼 fb、 ig各個社交平台，成日有嘢 update比人睇。
自從「淡定姐」方健儀離開大台同廉署後，又教書又做皮革，幾乎日日 fb都有嘢更新，多 job多到接唔停，仲忙過以前做主播。
同方健儀不遑多讓的王宗堯一樣接 job接到手軟，加上男神撐佔中 po fb唔怕被封殺，想做就做，有樣有諗法，被封為新一代男神是常識吧。男神對才女，梗係最好互問互答
讀書時冇人當我男神！
方：方健儀 王：王宗堯
方：由細到大都係男神？
王：其實細個唔係特別鍾意讀書，但父母覺得讀上去大學出路會好啲，所以就聽父母話。其實一開始考到男拔萃，但我爸爸係英華仔，身邊好多世伯都係英華仔，自然會覺得英華個校風好好，所以放棄男拔去讀英華。
英華係男校，所以冇分男神唔男神、校草嗰啲嘢，反而每日七點十分大家都知要去牛津道霸場打籃球，通常八點九度先集合，中間後時間就可以打波！不過我就冇入校隊，好多師兄弟都好好波，我知道英華𠵱家嘅校隊更加犀利，母校嘅運動水平一直都保持得好好，不過自問就唔係標青嗰啲！
方：對自己被稱為男神有咩感覺？
王：一開始會好唔慣，𠵱家你叫我「王生」我可能唔識應。對我嚟講，一開始對男神嘅定義係神枱級嘅人，或者一定係好靚仔，係一個遙不可及嘅人物，但後來我覺得我呢個男神嘅定義相對嚟講比較特別，係同其他藝人嘅關係更加 close，大家會做埋同一樣嘢，有同一樣嘅思想，有同一樣嘅口啓，同樣地關心香港呢一個地方，我覺得呢樣嘢嘅象徵意義大過喺神枱上面、遙不可及嘅人物。
方：英國讀書多艷遇？
王：會考已經去了英國讀書，一去到考嘅時候學英文比較難，要學習口音啦，加上要學一啲英國嘅歷史，要花時間去學，不過最後成績都可以，都拎到 C咁上下。
艷遇又冇咩喎，拍拖好難，因為始終佢哋會覺得你係中國人冇咁優越，如果係欖球隊、足球隊，係鬼仔個人又型啲，但我哋讀寄宿學校，全部着一式一樣嘅西裝，但中國人嘅身型比例冇鬼仔咁好睇，所以冇得比，惟有暑假返香港識朋友仔先有機會拍拖，英國真係好少。
大學遺憾冇住 Hall
王：最難忘的中大生活是？
方：喺中大最難忘嘅係一種遺憾，係冇得住宿舍。我中學開始住馬鞍山，馬鞍山去中大 15分鐘車程，所以唔合資格住宿舍。不過我都有屈過一次蛇，瞓喺窗台度，但瞓完一晚第朝腰酸骨痛，試過一晚就算。
王：中大新聞系多男神？
方：要搵個好似王宗堯呢種質素的確難，其他系我唔知，但我嗰年新聞系 70個同學入面，得７個男仔，迎新營每組勉強分到一個男仔，同屆嘅男同學都係書卷氣好重嘅，凡事好難兩全其美，我都唔怕得罪講句，我啲同學讀書好叻嘅，好有才子嘅感覺，靚唔靚仔就見仁見智就算𠵱家去教書，啲學生都話女多男少，呢個係新聞系傳統。
王：會點形容同老公嘅關係？
方：係好好朋友、良師益友、好好夫妻幾個角色。佢仲喺舊公司(TVB)，佢會體會到做傳媒有幾辛苦。因為當時我長期都返夜，老公都唔想我咁辛苦，我就話如果我想跳出嚟，佢都表示支持，由我離開廉署再跳出嚟做自由人，我都有同佢打定底話會比以前生活更加唔穩定，可能冇飯開喎，但佢繼續話唔緊要，最緊要我開心！好彩我同佢嘅想法好一致，例如話我做皮革成日都要通宵，冇時間陪佢，佢都冇反對過，佢話最緊要攞到滿足感，話見到我做到一件產品出嚟時嘅喜悅，好耐都冇見過，所以好慶幸有一個好支持我嘅老公！
撰文：葉浩婷
攝影：崔百祥
|
鍾意就快D Share啦！
|
|
|
