再開另一間啫！（設計對白）
探熱針
四洲太子女有拖拍 黃宗澤糖水鋪散檔
前度胡杏兒有着落，回復自由身的黃宗澤去年被爆跟名模楊崢姊弟戀見光死後，又傳出被四洲太子女戴凱欣睇中，女方更主動合作搞糖水鋪生意，拉近距離。不過，數月前太子女戀上做金融的新歡後，索性連糖水鋪都執埋，閂黃宗澤水喉。
劃清界線
上週四（九月十日）晚，四洲太子女戴凱欣，帶住在上海從事金融業，每月只定期返港幾日的男友 Justin出席時裝品牌活動，近日投資日式蛋糕店做到有聲有色的她，對於同黃宗澤在九龍城合資開的糖水鋪突然結業，未有否認，更刻意將朋友關係降級，與舊拍檔劃清界線。
「我不嬲同佢（ Bosco）都好少聯絡，佢係朋友嘅朋友，（會唔會再合作搞其他食肆？）都係睇番朋友嘅意見，其實我主力係睇四洲，好少睇甜品鋪。」戴凱欣毫不留情說。
有指鍾意同圈中人交朋友的戴凱欣，當年曾視黃宗澤為偶像，去年知道對方打算開糖水鋪「笑甜甜」，戴凱欣索性剎停自己搞 cafe的計劃，改為入股糖水鋪，開張後，又落手落腳帶朋友撐場。
飲食王國
由於黃宗澤大部分時間留在國內拍劇，二人雖然是生意合作伙伴，但見面機會甚少，加上黃宗澤曾公開以「只係普通朋友」澄清二人並非情侶關係，令做晒主動的戴凱欣好無癮，有拖拍加上有人提出將鋪頭頂手，太子女順水推舟，斬纜！事實上，一直銳意在飲食業大展拳腳的黃宗澤，近年賺人仔賺到笑，早已有足夠財力，唔使靠水喉亦可以發圍。
「 Bosco喺內地撈得好掂，拍一套三十集電視劇收過千萬人仔，所以佢好少返嚟；但 Bosco自己鍾意煮嘢食，之前喺九龍城開咗蠔吧，掟咗成四百萬出嚟搞，最初澤媽都好緊張，成日落去看鋪，好多時仲等到收鋪先走人，而家生意上晒軌道，又賺到錢，佢哋都吼緊啲啱地點嘅鋪位，諗住再開其他類型嘅食店。」知情者說。
買鋪發大
據了解，黃宗澤每次返香港，都會花時間周圍搵鋪位，主力是上環、西環一帶潮人新區。「 Bosco睇咗好多鋪，基仔（古巨基）之前用千幾萬買嗰個中環鋪位， Bosco都有睇過，不過覺得做食肆地方唔夠大，所以最後都冇要到。加上近排樓市麻麻有機會落價，佢話睇定啲，唔使心急。」知情者說。
藝人老闆
做生意，力不到不為財，藝人做老闆更加，能夠殺出血路的例如陳豪、譚小環和袁彌明，無時無刻都會將自己的生意掛在口邊，好 hard sell。
撰文、攝影、攝錄：娛樂組
nextb@nextmedia.com
|
鍾意就快D Share啦！
|
|
|
