2015年9月1日星期二

周麗淇主動提分手學王菲講「保重」暗示情斷王菲,周麗淇

【甩拖三個月】周麗淇主動提分手學王菲講「保重」暗示情斷

2015-09-01 15:25:00

據知，兩人分手原因係聚少離多。

「謝謝你的祝福！希望你一切安好！保重！」周麗淇咁樣隔空同拍拖兩年嘅男友徐正曦講。

類似例句，見諸2013年9月，王菲突然於微博寫呢句:「這一世，夫妻緣盡至此，我還好，你也保重。」暗示同李亞鵬離婚。

周麗淇同王菲兩句句子pattern、用字語氣，都相當似，同樣由女方開腔在先，好一句「保重」，已經講得好明：緣份已盡。本報收到消息，周麗淇同細佢六年嘅內地男星徐正曦，早於三個月前已和平分手，兩年情玩完。

分手一事本來冇人知，係因為徐正曦於上月30日、即周麗淇36歲生日當天，於微博貼咗四張周麗淇單人相，寫住Happy Birthday。呢輯相似係兩人拍拖未幾、齊齊去比華利山慶祝周麗淇34歲生日嘅相。(新聞連結: http://bit.ly/1htDhsP )徐正曦前日貼完句呢輯相，跟住周麗淇即於微博貼出「保重」呢句嘢作回覆，明示情已逝。

據知，兩人分手原因係聚少離多，周麗淇喺北京開劇，徐正曦在浙江橫店，成日見唔到，好易就嗌交。嗌得多自然傷感情，結果三個月前，由女方提出分手。周麗淇接受《蘋果》訪問時，被問及是否已分手？佢話:「我唔講喇，多謝關心。」未有否認。至於一手撮合兩人拍劇集《衛子夫》、因而撻着嘅劉家豪，接受本報訪問時，就完全唔知兩人已分開。

已經三十有六嘅周麗淇，決斷斬情絲，一來係唔想再拖，二來佢都想專心事業、搏多幾年，呢兩年主力攻打內地市場，依家忙緊新劇《臥底》，仲簽埋內地經理人，全心搏殺，自是不想在感情事上再拖拖拉拉。分手，亦屬正常。

周麗淇嘅經理人周先生接受本報訪問就表示:「Niki現在很努力工作，她會把握時間，勤力工作的了；感情事我一向不過問，我覺得她會懂得處理。」據知周麗淇其實一直不乏追求者，但應該未揀定，難怪正日生日都只係由劇組同佢慶祝喇。