掃呢頁CODE去手機

2015年10月7日 星期三

瘋狂性騷擾女星 「 17」玩家賤聊周秀娜 [FACE - 437] 周秀娜,MF,



開心直播

開頭娜姐諗住開直播叫粉絲嚟支持佢,娜姐一開機,即時吸引過千人睇直播。網上圖片

封面

瘋狂性騷擾女星 「 17」玩家賤聊周秀娜

人氣 app「 17」令全城瘋狂,有人甚至將自己私生活同性生活開心些牙,「 17」失控結果被 App Store同 Google Play下架,但一早下載咗嘅可以繼續玩。

香港唔少女星都一早走入熱潮大玩「 17」,有得兜口兜面俾你同女星傾偈喎,你會講乜呢?喺咁唔使負責任嘅半虛擬環境下,有啲網友就口出狂言,留言性騷擾一眾女星,要求除衫、沖涼乜都有,女神周秀娜都成為性騷擾目標,有人睇住娜姐直播時自稱「 X已扯」,周秀娜轉數極快兼神回:「咩嘢旗呀?你邊個國家呀?」極速打沉賤玩家。

雖然「 17」已經下架,卻無阻女星繼續日日玩直播,無論食飯、化妝、做緊節目定行街買衫都直播,夠晒貼身。可惜一啲唔生性嘅巴打就趁呢個機會大講鹹濕嘢性騷擾女星。

「呢個世界咩人都有!」

週一( 5日)周秀娜到尖沙咀出席活動,因早到會場便開啟「 17」直播功能同粉絲傾下偈,娜姐初時面露笑容講下自己工作又講下隻表咁, fans都好乖問下娜姐喺邊個商場之類,但突然有幾位網友加入,一見到周秀娜即話「 X已扯」又叫佢「快啲除 3(衫)」,搞到娜姐面色一沉。

之但係娜姐有乜風雨未見過?扁一扁嘴即回:「旗呀?咩嘢旗呀?你邊個國家㗎?我呢隻表紅色,應該瑞士嚟嘅!係喇!你咩旗?國家旗?如果係嘅話唱番首國歌都 ok喎,我未聽過瑞士國歌。」之後有巴打繼續講鹹嘢,周秀娜已經費事理。

娜姐事後對《 FACE》回應:「我又唔會嬲喎,因為太快一閃即逝,啲氣都一齊走咗;呢個世界咩人都有,同埋有時(留言)太快,快到佢過咗其實我都睇唔到。」呢啲咪叫道行高囉!

驚現騷擾

但直播不夠 3分鐘,已有口痕友自稱「×已扯」,又叫娜姐「快啲除 3」,娜姐睇見都窒一窒。網上圖片

淡定回應

好彩娜姐見慣世面,一句問:「你咩旗?國家旗?」四両撥千斤趕走鹹濕佬。網上圖片

周秀娜形象性感,應付毒男有一手,留言性騷擾邊嚇到佢?

Coffee 奇怪人叫我剝衫

香港好多女星都追上潮流玩「 17」,曾經被性騷擾嘅都唔少,因為殘廁響朵嘅 Coffee(林芊妤)係其中之一; Coffee鍾意直播做瑜伽同化妝,有人讚亦有人批評,有人重提殘廁激到 Coffee喊,亦有人心邪講衰嘢。 Coffee話:「奇怪嘅人一定有,會叫你爆衫,或者我做緊瑜伽嗰陣話 XX推車,我通常會 ignore咗佢,但𠵱家愈嚟愈少呢啲人,都好正常,問下我擇偶條件之類都幾 normal。」

網上圖片

Coffee愛玩直播,除咗教瑜伽外,連坐地鐵都可以直播益街坊。

網上圖片

Jumbo:叫我影埋腳

而模特兒 Jumbo(曾淑雅)亦係「 17」玩家,她就強調要保護自己:「平時會外出至玩 live,因為保障私隱比較少喺屋企開。」但就算喺街有啲網民照樣口花花, Jumbo話:「有人試過留啲侮辱性字句,包括粗口呀,叫你拉低啲鏡頭呀,衰啲嘅會叫你影埋腳呀,然後批評你咁囉!」

Jumbo做過𡃁模又影過泳衣,愛在「 17」自放泳衣相。網上圖片

Jumbo自稱經常有人留言講鹹濕嘢, Jumbo話:「衰啲嘅會叫你影埋腳呀,然後批評你咁囉!」網上圖片

莊思敏:叫我露奶!

莊思敏都係「 17」玩家,素顏直播都夠膽死,之前有人疑似性騷擾,莊思敏都未驚過!網上圖片

莊思敏可以話係第一批玩「 17」嘅藝人,直播內容隨心而發,一時素顏教化妝,一時影活動,喺佢自 po照片中見到佢玩直播時實況,當中仲見到有網友喺直播時留言:「不一般的約炮平台」,當時莊思敏點答佢呢?佢回應時解釋:「有時唔知佢哋寫咩,係咁 loop出嚟,有啲賣廣告添。」

莊思敏又多次被性騷擾,她表示:「有啲攻擊性說話同奇怪要求,叫我露奶呀、除衫呀、問我可唔可以影腳呀、影腳趾 5分鐘呀,有啲叫我沖涼、影啲私人嘢、問幾錢晚呀都有,我都唔會答。」但就冇諗過 block對方咁話。

素人索女 仲受歡迎

除咗女星,好多素人玩直播都好受歡迎,當然囡囡就更多人 like啦,如果做過下模特兒或者拍戲拍廣告,亦會好受網友關注。

性感童星  Angela Wong

Angela(黃凱琪)認真巴閉,短短一星期「 17」嘅粉絲人數由 500直標到 3萬,被捧為「 17女神」,皆因佢 po嘅相張張省鏡身材又突出,直播又唔造作絕對真性情。

原來 Angela喺香港出世,細細個就移民咗去美國洛杉磯,𠵱家喺 UC Berkeley修讀媒體研究,中英語流利;仲做過童星, 01年喺成龍嘅《贖金之王》客串過,又拍過廣告,《我和殭屍有個約會》做况天佑同學。不過有時素顏玩直播就俾網友批評樣貌與圖像不符喎,化晒妝你又話假啫!

Angela在「 17」的版頭相很香艷,吸引唔少毒仔瀏覽。 網上圖片

Angela細個客串過成龍嘅《贖金之王》,不過 Angela試過素顏直播,有網友話佢樣貌與圖像不符。 網上圖片

台灣索模 林佩佩

佩佩係台灣音樂創作人兼模特兒,今年嚟香港參加動漫展而受注目,樣子身材都非常吸睛,而且唔介意 po相騷畀大家睇,𠵱家粉絲人數已近 7萬。

佩佩露咪唔錫身,上次來動漫節擔任 game girl,更成為大會焦點。 網上圖片

網上圖片

籃球女神  Jessie

Jessie(方詠琳)無論「 17」、 ig同 fb都係叫 LamLamJessie好易搵,佢係悠悠女子籃球隊成員,正職售貨員,因樣子甜美拍過唔少廣告,亦肩負起宣揚籃球運動嘅使命。玩「 17」唔夠兩星期已得到 20萬心心,畀個貼士大家, Jessie鍾意夜媽媽玩直播㗎!

Jessie係悠悠籃球隊成員,好多波牛都有 follow女神「 17」。 網上圖片

網上圖片

仔都玩直播

網上圖片

吳業坤

坤哥算係少數大台男藝員熱衷玩「 17」份子,除了經常放自拍相外,又試過即場直播清唱,吸引唔少妹妹仔。

網上圖片

周志文

被大台棄用的周志文,要自我宣傳亦靠「 17」直播,不過直播期間有網友問佢係咪「食」過吳若希,他卻唔敢回應,最後連直播都停埋。

網上圖片

羅孝勇

另一位離開大台嘅「巨聲幫」羅孝勇亦愛玩「 17」,除咗直播夾 band情況外,仲將剛剛睡醒的床照公開,好識呃 like!

玩「 17」免費去美國

雖然「 17」被下架,不過仍然搞作多多,玩「 17」 app直播有機會賺錢好多人都知,最近仲挑選 10個用戶下週免費暢遊美國洛杉磯同拉斯維加斯。根據黃立成 fb透露,會從有良好經營平台嘅用戶中選出 8個幸運兒, 2名則喺 fb參加及抽出,日前已公布晒所有名單。玩 app都咁筍唔怪得打不死

「 17」之父 黃立成被警約談

《蘋果日報》圖片

台灣藝人黃立成有份投資的「 17」,因涉及直播露點和性愛片段,遭台灣警方約見,另有 5名直播裸體的網民則要接受偵訊。本週一( 5日)黃立成及 5人被限制出境,但對一般用家嚟講未有影響。

採訪、撰文、攝影:娛樂組

鍾意就快D Share啦!