劇中演員大部分都是應采兒親自選角，唯獨趙碩之的護士角色是劇組在開鏡前臨急搵入組，知名度同一班名氣串星差一截。
探熱針
應采兒藐爆趙碩之
有老細向華強撐，應采兒為正播出的 Letv網劇《天才在左 瘋子在右》落場做監製，首次打晒骰的她勁打人情牌，老公陳小春唔收錢義演外，好友鄧麗欣、方力申、柯有倫、張建聲、關智斌、鍾麗緹等紛紛以友情價瞓身支持。
唯獨開拍前突然插入的趙碩之，戲份唔多但竟然要劇組就期配合，搞到應采兒㷫爆！
扮晒大牌
首次埋位做監製，又要分身落場演出的應采兒大為緊張，全權挑選演員陣容，連每日拍攝期表，都親自過目審批。
據知，《天才在左 瘋子在右》開拍前，尚欠一個護士角色未定到人選，無心水的應采兒見角色只係大茄，於是下放給劇組安排，料不到劇組竟然找來名氣同其他串星差一大截的趙碩之。
「全部演員無論多戲少戲，都係丁丁（應采兒）自己揀，佢見個角色行行企企，加上開劇之前仲有其他事要忙，咪諗住將件小事交俾劇組囉！點知竟然搵咗 Wylie（趙碩之），激到佢生蝦咁跳！班數差太遠都算，最煩係 Wylie要劇組就晒佢啲期，當正自己係主角咁！丁丁仲話 Wylie恃住跟過秋生學戲，以為自己好勁，態度好囂！」一名劇組人員透露。
加自己人
眼裡容不下一粒沙的應采兒，在現場見到趙碩之出錯，都要副導做傳聲筒，連同對方對話都不情願。
但趙碩之竟妙想天開，引薦同門師弟黃竣鋒（前亞洲先生，原名黃集鋒）入組，之後劇集做宣傳活動，她又多次做攝石人，插正中間影大合照，令到本來已經睇她唔順眼的應采兒更火上加油！
「 Wylie都幾唔知『定』，成日周圍撩同劇嘅演員好似 Stephy小方傾偈影相，跟住又放晒上網，有記者探班或者做宣傳活動，佢一定搵到位搶風頭，唔知嘅真係會以為佢擔正做女主角！」劇組人員說。
應采兒唔 like，趙碩之都話之你，明搏插！
撰文、攝影、攝錄：娛樂組
|
鍾意就快D Share啦！
|
|
|