爆壹爆
鴨寮街男神 BB
早前俾內地網民大讚「帥到令人腿軟」、「超帥古天樂」，喺海港城連卡佛 Tom Ford化妝櫃位做 sell屎嘅靚仔，由於型英帥靚正，令唔少內地女客人嗒晒糖，專登長途跋涉來港朝聖幫襯，真誇張。爆哥近日聽朋友講，原來深水埗鴨寮街都有個靚仔男神，好多女客人見到佢都口水流落地下，尤其好多外傭姐姐，仲會成日搵佢買電話添。
呢個男神叫做 Jason，今年二十九歲，身高一米八六，成副 model身形，加上青靚白淨，而且仲係四間鋪嘅老細，唔怪得喺鴨寮街響晒朵。爆哥自問已經玉樹臨風女見女拜，但拍埋佢度真係唔見影。 Jason都話，特別多女客人嚟撞佢，問呢樣問嗰樣。尤其星期日， Jason更加忙爆，因有好多外傭姐姐嚟幫佢買手機，「可能我夠高，佢哋容易見到我啩，哈哈哈。」
鴨寮街男神呢個名，並非浪得虛名。 Jason話，唔少女街坊，平時都會買吓西餅請佢食，仲有唔少阿姐問佢結婚未，會毛遂自薦或話要介紹自己個女俾佢識。最誇張一次，係一個女客人，為咗見佢，一日嚟買幾次電話，買完又放，之後仲等 Jason收工，要 Jason送佢返屋企。咁多女粉絲，女友知唔知先？「佢唔知㗎，我都冇同佢講返工嘅嘢，佢知道一定會嬲啦。」巴之閉啦，嬲爆。
新義安總管飲朱太喜酒
金利豐老闆娘朱李月華上個禮拜做奶奶，喺會展擺咗一百五十圍，爆哥聽聞好多猛料之人到場喎，無他，朱太相識滿天下，連江湖中人都俾面。
中環班老死爆料，新義安總管林江都有去飲喎，林江當日著套老西，身形好 fit，走埋去與一眾財演合照，同枱有郭思治、鄧聲興、馬主鄭強輝。同場仲有英超球會伯明翰前班主楊家誠，雖然佢等緊單洗黑錢案上訴終院，但係佢當晚心情好靚，滿場飛同人合照。爆哥打俾郭 sir問，佢話唔識林江喎，仲話：「對佢冇印象。」不過睇嚟林江喺政經界好吃得開喎，半年前林江生日，新民黨田北辰去飲，今次財經界盛事，特首都有到賀，唔知 689同林江有冇機會開個桃園飯局聚一聚呢？
才子批中預言 網民洗版力撐
早前才子陶傑話，歐洲國家唔應該無條件接收敍利亞難民，驚有恐怖分子搏懵潛入，即俾另一才子老蕭狂插人渣，仲要連環開火鬧爆佢。結果上星期法國發生恐怖襲擊，死咗百幾人。陶傑開口中，所以開咪做節目時都零舍招積，好多網民洗版力撐。
爆哥即刻打俾才子，佢咁啱喺法國機場，見到搬運行李嘅職員係白人同黑人，個心先定啲。之前俾老蕭鬧係人渣，會唔會覺得唔抵？才子話對老蕭嘅人格及其言論，唔會放在眼內。佢話自己唔係未卜先知，只係以常識同理性去諗嘢。佢仲話，現時香港社會氣氛特別，有人別有用心用政治宣傳去洗人腦，令人嘅判斷力愈來愈差。佢仲寸爆話，網民之所以洗版力撐，證明好多人唔想再聽帶有偏見嘅聲音，更加唔想有人用極權教你應該點樣愛國喎。
爆哥乜料
金融界撈家，穿梭黑白政商界，朋友遍布旺角至中環，每星期都八到
唔同料，同《壹》仔讀者過吓癮！
|
鍾意就快D Share啦！
|
|
|