因「無嘢玩」而創辦 Timable， Mike（左）和 Sam（右）每天搜羅不同活動，但再無時間參與其中，有得睇、無得玩！
Start up擂台
以為實爆 活動 app捱窮 4年等天使
屬中學同學的阮文朗（ Sam）和高立基（ Mike），愛好活動，發現自己經常錯過心水表演，因而度出了商機。他們創立的 Timable，將香港的文化、慈善、消閒娛樂活動，通通放在這個平台。週末與家人、朋友出街，便不愁無節目。
只是，兩人在缺乏資金下捱了四年，不斷思考應否放棄，終於上年得到天使基金投資。
一有資金到手，兩人的目標就變成了上市！本刊找來有投資手機 app的上市公司先思行（ 595）
行政總裁蘇智安（ Billy）向二人「盤問」。近年 Billy投資的南韓手機遊戲商 Me2on，前年收入逾一億元，他亦是 GoGoVan的投資者之一。
對於 Sam及 Mike話要上市， Billy說：「如果估價吸引，我絕對會投資。」究竟有咩咁吸引？
我點 sell：以為實爆
週末要搵嘢玩，就連 Google、 Yahoo!，都無一個有效方法，幫你找到特定時間、地點的活動。但在 Timable，就可以活動性質如音樂、夜蒲、工作坊等分類搜尋。很方便吧！活動我們有專人在 facebook、網上「收集」，但投資者四年來都「收集」不到！
最初無錢，我們就兼職，上班時「蛇王」睇雜誌找活動、放工就寫 Timable的系統。但要跳出 comfort zone，全職做，最初很掙扎。突破的動力來自雅虎香港。一二年雅虎與我們合作，將我們內容放在他們專頁中。即時雄心萬丈起來，還辭了職！可惜，除了數碼港的資助外，一直沒有天使（ Angel Fund）。幾年間掙扎求存，中間一路諗放棄，不過想放棄之際又找到西九文化區，成為長期合作大客，之後又接觸到麥當勞，他們都有付費。其實我們的狀態很尷尬，無蝕錢但做唔起。
是不是應該放棄，做回打工仔？這刻我找到天使當然答你：「唔好放棄！」捱了四年，而家我哋每月有五十萬用戶瀏覽，收入包括廣告費、排名費（將活動放頭位的費用），並按一天、一星期或一個月收費。我們亦會派同事做採訪宣傳。上年有了 Sunny（天使投資者）投資，立時迅速發展。但未來幾年，我哋只會𢭃份糧，因為要留錢搞上市！
專家盤問：香港夠活動咩？
B： Billy T： Timable
B：香港有咁多活動，讓你細分時間地點？
T：的確，例如屯門、天水圍活動不多，為避免無活動顯示，屯門公園的爬蟲館、天水圍濕地公園雖然不是活動，但其實都可以去 hea、去玩，所以將來會加入開放時間，放上平台介紹給用家。
B：過往用戶如何認識你們？你覺得還有多少增長空間？
T：我們十五至三十多歲的用家最多，多是透過演唱會、嘉年華認識我們。例如在 Google、 Yahoo!輸入「張學友演唱會」，我們都排在第一、二位。坦白講，用戶預計只有一成增長。但剛推出的賣飛功能，包括替卓韻芝棟篤笑及一田 CEO莊偉忠座談會賣門券，這部分有很大的發展空間。我們期望這方面增長，可與廣告收入相若。
B：點贏城市電腦售票網、快達票？
T：他們還在用紙票，又要排隊買，幾個朋友看演唱會，又要等齊人才能入場。但在 Timable買票後，可以直接在手機將電子票 send給朋友，朋友再憑掃描電子門票入場，就不怕有人遲到。加上我們在前台宣傳，配合後台賣票，一條龍服務。
考慮海外市場？
B：你覺得 Timable目前最大的挑戰是什麼？
T：老實說，香港市場不大，比起其他國家差很遠。加上香港市場的線上宣傳還未成熟，比起線下宣傳還有一段距離。例如隧道口的天價廣告，效用有多大很難估計。但其實這筆錢用在線上，可以鋪天蓋地，水浸到你唔想睇！更重要的是，線上宣傳，有多少點擊、消費，都一清二楚，但需要時間改變、教育客人吧！
B：香港市場已差唔多，有拓展海外市場的計劃？
T：有，我們首選台灣，因為當地比香港有更多文化活動，需要我們這個平台去將市民與主辦單位連結。台灣都有類近 Timable的公司「城市通」，但首頁劈頭就說「我有十二萬場活動等你玩」，其實太多不夠精囉！我們在台灣找到一間主要負責賣票的公司，正與他洽談合營。我們負責前台宣傳，他負擔賣票。先做台北，再做台中、台南。不過如果有人注資，我們自行做台灣、韓國、日本幾個市場都可以。
終極判決：無諗返大陸夠醒！
介面上我覺得找活動都頗簡單，過程流暢。雖然有廣告，但不會多到你唔想睇，這個平衡拿捏得幾好。作為一間 early stage無「天使」的公司，捱到幾年進入 growth stage，我給予八至九分！台灣市場競爭比較細，佢哋第一步先去台灣好啱，不回內地就好夠醒！返大陸除非你有很好的計劃、資源和人脈。
其實香港人會去台灣，台灣人都會來香港，若果 Timable加入台灣內容，這個平台就可以成為一個兩地人的旅遊資訊平台，不用倚賴旅遊書。如果台灣、新加坡、日本幾個亞洲國家都做到，內容能轉換成不同語文，做到亞洲的旅遊資訊平台，離上市就不遠了。我覺得這間公司很吸引，我會再與他們商談入股的事，如果價啱就會加入！
撰文：孫樂祈
攝影：關永浩
攝錄：廖健昌
ed_bn@extdigital.com.hk
|
鍾意就快D Share啦！
|
|
|